december ki dhup

agar mire lafz

terī āñkhoñ se ashk ban kar gire nahīñ haiñ

agar mire lafz

tere hoñToñ pe giit ban kar khile nahīñ haiñ

agar mire lafz

nā-rasā haiñ

ki merī palkoñ kī Tahniyoñ se

mire lahū kā koī bhī pata

tirī niilī sī niiñd kī jhiil ke badan par

girā nahīñ hai

vo dā.era hī banā nahīñ hai

maiñ jis meñ juḌte udhaḌte rishtoñ ko

DhūñD letā

agar mire lafz

tere siine meñ sarsarāte

tujhe mire paas khīñch laate

to maiñ samajhtā

ki merī be-zor muTThiyoñ meñ

zamīn kī gardish taḌap rahī hai

yūñhī sahī phir

chalo mire lafz nā-rasā haiñ

magar zamāne badalte rahte haiñ

aur ye din-rāt Dhalte rahte haiñ

mire dil meñ ummīd kī ek kiran zinda hai

jo kisī din

terī hinā-rañg uñgliyoñ se

mirī tamanna kā garm dhāgā lapeT degī

isī december meñ

terī jholī se sard-mehrī kā

sab switer sameT legī

agar mere lafz

teri aankhon se ashk ban kar gire nahin hain

agar mere lafz

tere honTon pe git ban kar khile nahin hain

agar mere lafz

na-rasa hain

ki meri palkon ki Tahniyon se

mere lahu ka koi bhi pata

teri nili si nind ki jhil ke badan par

gira nahin hai

wo daera hi bana nahin hai

main jis mein juDte udhaDte rishton ko

DhunD leta

agar mere lafz

tere sine mein sarsaraate

tujhe mere pas khinch late

to main samajhta

ki meri be-zor muTThiyon mein

zamin ki gardish taDap rahi hai

yunhi sahi phir

chalo mere lafz na-rasa hain

magar zamane badalte rahte hain

aur ye din-raat Dhalte rahte hain

mere dil mein ummid ki ek kiran zinda hai

jo kisi din

teri hina-rang ungliyon se

meri tamanna ka garm dhaga lapeT degi

isi december mein

teri jholi se sard-mehri ka

sab switer sameT legi