december

tāq-e-dil pe tirī yādoñ ko sajā rakhā hai

is tabarruk kī zarūrat mujhe jab paḌtī hai

apnī āñkhoñ se lagātī huuñ inheñ chūmtī huuñ

aur phir taaq pe dobāra sajā detī huuñ

ahd-e-furqat meñ shab-o-roz guzar jaate haiñ

terī yādeñ haiñ kabhī phuul kī sūrat dil meñ

aur kabhī motiyoñ kī tarah se aañsū ban kar

chashm-e-ehsās se dāman pe bikhar jaatī haiñ

maiñ unheñ saiñt ke rakhtī huuñ guzāre ke liye

terī yādoñ ko magar saiñt ke kab tak rakhūñ

barf lamhoñ meñ ye hāthoñ se phisal jaatī haiñ

us se kahnā ki december bhī chalā aayā hai

sard mausam mire ehsās ko garmātā hai

dil-e-vahshī to dhaḌaktā hī chalā jaatā hai

ruk na jaa.e kahīñ tajdīd-e-tamannā kī ghaḌī

maḳhmalīñ shauq kī chādar hai mire sar pe paḌī

us se kahnā ki december na guzar jaa.e kahīñ

aur taqvīm-e-mohabbat na bikhar jaa.e kahīñ

taq-e-dil pe teri yaadon ko saja rakha hai

is tabarruk ki zarurat mujhe jab paDti hai

apni aankhon se lagati hun inhen chumti hun

aur phir taq pe dobara saja deti hun

ahd-e-furqat mein shab-o-roz guzar jate hain

teri yaaden hain kabhi phul ki surat dil mein

aur kabhi motiyon ki tarah se aansu ban kar

chashm-e-ehsas se daman pe bikhar jati hain

main unhen saint ke rakhti hun guzare ke liye

teri yaadon ko magar saint ke kab tak rakhun

barf lamhon mein ye hathon se phisal jati hain

us se kahna ki december bhi chala aaya hai

sard mausam mere ehsas ko garmata hai

dil-e-wahshi to dhaDakta hi chala jata hai

ruk na jae kahin tajdid-e-tamanna ki ghaDi

maKHmalin shauq ki chadar hai mere sar pe paDi

us se kahna ki december na guzar jae kahin

aur taqwim-e-mohabbat na bikhar jae kahin