diwar

ye añdhere

ye añdheroñ meñ garajte hue tūfān kā shor

merā maazī

mirī ḳhūñ-gashta umīdoñ kā mazār

ye rivāyāt-e-kuhan

aur ġham-e-ayyām ke riste hue zaḳhm

jaise dīvā-e-guzargāh-e-tamaddun ke shigāf

vaqt ke phailte baḌhte hue sāyoñ ko liye

aaj bhī zulmat-e-daurāñ hai sharīk-e-ġham-e-zīst

aaj

aur aaj ke ḳhvāboñ kā sunahrī gumbad

apne maazī kī rivāyāt pe hai nauha-kunāñ

jis ke atrāf meñ sadiyoñ kī tarah

aaj bhī saikḌoñ bhūkoñ kī qatāreñ haiñ khaḌī

kār-ḳhānoñ ke dafātir ke miloñ ke aage

aur khaliyānoñ ke bāzāroñ ke chaurāhoñ ke

ird-gird ek qatār

ek lambī sī qatār

log kahte haiñ ye bhūke haiñ ye nange haiñ ġharīb

kaun kahtā hai ye nange haiñ ye bhūke haiñ ġharīb

chīḳh kar dete haiñ aivān-e-hukūmat ye javāb

ye añdhere

ye añdheroñ kī kamīñ-gah ke luTeroñ kā fareb

sāmrājoñ kā fareb

āmriyyat kā faroġh

aaj lau de ke bhaḌak uTThe haiñ riste hue zaḳhm

in añdheroñ se kaho

in añdheroñ kī kamīñ-gah ke luTeroñ se kaho

duur ho jaa.eñ nigāhoñ se hamesha ke liye

kal jo dīvār thī maazī ke añdheroñ kī amiiñ

aaj kuchle hue insān girā.eñge use

surḳhī-e-ḳhūñ kī tarah surḳh hai fardā kī bahār

raushnī le ke baḌho aur baḌho aur baḌho

ye andhere

ye andheron mein garajte hue tufan ka shor

mera mazi

meri KHun-gashta umidon ka mazar

ye riwayat-e-kuhan

aur gham-e-ayyam ke riste hue zaKHm

jaise diwa-e-guzargah-e-tamaddun ke shigaf

waqt ke phailte baDhte hue sayon ko liye

aaj bhi zulmat-e-dauran hai sharik-e-gham-e-zist

aaj

aur aaj ke KHwabon ka sunahri gumbad

apne mazi ki riwayat pe hai nauha-kunan

jis ke atraf mein sadiyon ki tarah

aaj bhi saikDon bhukon ki qataren hain khaDi

kar-KHanon ke dafatir ke milon ke aage

aur khaliyanon ke bazaron ke chaurahon ke

ird-gird ek qatar

ek lambi si qatar

log kahte hain ye bhuke hain ye nange hain gharib

kaun kahta hai ye nange hain ye bhuke hain gharib

chiKH kar dete hain aiwan-e-hukumat ye jawab

ye andhere

ye andheron ki kamin-gah ke luTeron ka fareb

samrajon ka fareb

aamriyyat ka farogh

aaj lau de ke bhaDak uTThe hain riste hue zaKHm

in andheron se kaho

in andheron ki kamin-gah ke luTeron se kaho

dur ho jaen nigahon se hamesha ke liye

kal jo diwar thi mazi ke andheron ki amin

aaj kuchle hue insan giraenge use

surKHi-e-KHun ki tarah surKH hai farda ki bahaar

raushni le ke baDho aur baDho aur baDho