dil

pūchho na mujh se ishq meñ kyā ho gayā hai dil

sar-chashma-e-ḳhulūs-o-vafā ho gayā hai dil

maiñ us ke jazb-e-shauq kī tāsīr kyā kahūñ

tujh sā hī ab to nām-e-ḳhudā ho gayā hai dil

kyā DhūñDhtī hai siina meñ ab o nigāh-e-nāz

muddat huī ki sarf-e-vafā ho gayā hai dil

kyā lutf hai ki saare zamāne kī hai ḳhabar

is kī ḳhabar nahīñ hai ki kyā ho gayā hai dil

ik iztirāb-e-shauq ki ik shauq-e-iztirāb

mujh ko ḳhabar nahīñ hai ki kyā ho gayā hai dil

maanā ki barq-e-husn bahut be-qarār hai

us se bhī kuchh taḌap meñ sivā ho gayā hai dil

ab be-sabab bhī ashk bhar aate haiñ aañkh meñ

kuchh is tarah kā dard-bharā ho gayā hai dil

TuuTe hue diloñ ne rulāyā hai is qadar

TuuTe hue diloñ kī sadā ho gayā hai dil

ye sach hai dil vo ḳhuub hai jo bā-ḳhudā rahe

yuuñ bhī magar huā hai ḳhudā ho gayā hai dil

phir kyoñ hai is ġharīb ke sar tohmat-e-ḳhudī

jo terī maslahat ne kahā ho gayā hai dil

nairangi-e-jahāñ kī hai saarī ḳhabar ise

phir bhī asīr-e-hirs-o-havā ho gayā hai dil

baiThā huuñ ro ke dil ko jo maiñ in dinoñ 'jalīl'

halkā misāl-e-mauj-e-sabā ho gayā hai dil

puchho na mujh se ishq mein kya ho gaya hai dil

sar-chashma-e-KHulus-o-wafa ho gaya hai dil

main us ke jazb-e-shauq ki tasir kya kahun

tujh sa hi ab to nam-e-KHuda ho gaya hai dil

kya DhunDhti hai sina mein ab o nigah-e-naz

muddat hui ki sarf-e-wafa ho gaya hai dil

kya lutf hai ki sare zamane ki hai KHabar

is ki KHabar nahin hai ki kya ho gaya hai dil

ek iztirab-e-shauq ki ek shauq-e-iztirab

mujh ko KHabar nahin hai ki kya ho gaya hai dil

mana ki barq-e-husn bahut be-qarar hai

us se bhi kuchh taDap mein siwa ho gaya hai dil

ab be-sabab bhi ashk bhar aate hain aankh mein

kuchh is tarah ka dard-bhara ho gaya hai dil

TuTe hue dilon ne rulaya hai is qadar

TuTe hue dilon ki sada ho gaya hai dil

ye sach hai dil wo KHub hai jo ba-KHuda rahe

yun bhi magar hua hai KHuda ho gaya hai dil

phir kyon hai is gharib ke sar tohmat-e-KHudi

jo teri maslahat ne kaha ho gaya hai dil

nairangi-e-jahan ki hai sari KHabar ise

phir bhi asir-e-hirs-o-hawa ho gaya hai dil

baiTha hun ro ke dil ko jo main in dinon 'jalil'

halka misal-e-mauj-e-saba ho gaya hai dil