dilli

dillī ki is jahāñ meñ azīm-o-qadīm hai

ilm-o-fan-o-hunar kī sadā se na.iim hai

allāh is kī azmat-e-dīñ kā aliim hai

tafsīr-e-dil hadīs-e-ḳhudī kā fahīm hai

gītā-purān ke bhī fasāne meñ zikr hai

tārīḳh se bhī qabl zamāne meñ zikr hai

dillī kā pāḌavoñ ke tarāne meñ zikr hai

indar-prasth tak ke sajāne meñ zikr hai

dillī sadā se markaz-e-bazm-e-shahāñ rahī

samrāT chakrvartī o shāh-e-jahāñ rahī

pīrāna-sāl ho ke bhī har-dam javāñ rahī

pachchīs baar luT ke bhī ye kahkashāñ rahī

mañgol shak kushān darāviḌ ki hoon hoñ

vo āriya arab hoñ ki ahl-e-funūn huuñ

vaidik hoñ bodh jain ki ahl-e-junūn hoñ

qaum-e-arab ke hoñ ki musalmāñ ke ḳhuun hoñ

duniyā kī kitnī nasloñ ne is ko sajāyā hai

har dharm diin zaat ne is ko basāyā hai

sāre-jahāñ meñ ishq kā markaz rahī sadā

sāre-jahāñ meñ Dañkā isī shahr kā bajā

barbādiyoñ se aaj bachāo use rafīq

'gulzār'-e-hind phir se banāo ise rafīq

dilli ki is jahan mein azim-o-qadim hai

ilm-o-fan-o-hunar ki sada se naim hai

allah is ki azmat-e-din ka alim hai

tafsir-e-dil hadis-e-KHudi ka fahim hai

gita-puran ke bhi fasane mein zikr hai

tariKH se bhi qabl zamane mein zikr hai

dilli ka paDawon ke tarane mein zikr hai

indar-prasth tak ke sajaane mein zikr hai

dilli sada se markaz-e-bazm-e-shahan rahi

samraT chakrwarti o shah-e-jahan rahi

pirana-sal ho ke bhi har-dam jawan rahi

pachchis bar luT ke bhi ye kahkashan rahi

mangol shak kushan darawiD ki hoon hon

wo aariya arab hon ki ahl-e-funun hun

waidik hon bodh jain ki ahl-e-junun hon

qaum-e-arab ke hon ki musalman ke KHun hon

duniya ki kitni naslon ne is ko sajaya hai

har dharm din zat ne is ko basaya hai

sare-jahan mein ishq ka markaz rahi sada

sare-jahan mein Danka isi shahr ka baja

barbaadiyon se aaj bachao use rafiq

'gulzar'-e-hind phir se banao ise rafiq