do chiDiyan

yaad hai aaj bhī mujh ko vo tarab-ḳhez samāñ

ik hasīñ shāḳh pe baiThī huī thiiñ do chiḌiyāñ

ishva-o-ġhamza andāz meñ thiiñ lā-sānī

un kī tasvīr se zāhir thā kamāl-e-mānī

un ke naġhmoñ se bahak jaatā thā gulshan saarā

un kī āvāz se ruk jaatā thā bahtā dhārā

un kī har taan pe ho jaatī thiiñ shāḳheñ raqsāñ

un ke har giit se ho jaate the ġhunche ḳhandāñ

dil meñ rakh lete the gul un kī adā.eñ chun kar

jhuum uThtī thī havā un kī sadā.eñ sun kar

us hasīñ shāḳh se ab uḌ ga.iiñ donoñ chiḌiyāñ

ab javānān-e-chaman karte haiñ fariyād-o-fuġhāñ

ho gayā ab chamanistāñ kā nazāra sunsān

rāste ho ga.e ḳhāmosh ravish hai vīrān

un hasīñ chiḌiyoñ se kartā thā mohabbat maiñ bhī

un ke naġhmoñ se basā letā thā jannat maiñ bhī

mujh se ab dekhī nahīñ jaatī hai vo vīrāñ shāḳh

mujh ko kar detī hai maġhmūm vo ab be-jāñ shāḳh

jab vo naġhme hī nahīñ haiñ to chaman hai bekār

us taraf jaao to chal jaatī hai dil par talvār

yaad hai aaj bhi mujh ko wo tarab-KHez saman

ek hasin shaKH pe baiThi hui thin do chiDiyan

ishwa-o-ghamza andaz mein thin la-sani

un ki taswir se zahir tha kamal-e-mani

un ke naghmon se bahak jata tha gulshan sara

un ki aawaz se ruk jata tha bahta dhaara

un ki har tan pe ho jati thin shaKHen raqsan

un ke har git se ho jate the ghunche KHandan

dil mein rakh lete the gul un ki adaen chun kar

jhum uThti thi hawa un ki sadaen sun kar

us hasin shaKH se ab uD gain donon chiDiyan

ab jawanan-e-chaman karte hain fariyaad-o-fughan

ho gaya ab chamanistan ka nazara sunsan

raste ho gae KHamosh rawish hai viran

un hasin chiDiyon se karta tha mohabbat main bhi

un ke naghmon se basa leta tha jannat main bhi

mujh se ab dekhi nahin jati hai wo viran shaKH

mujh ko kar deti hai maghmum wo ab be-jaan shaKH

jab wo naghme hi nahin hain to chaman hai bekar

us taraf jao to chal jati hai dil par talwar