do paDosi

zafar bhaa.ī ko saarā shahr jaane

unheñ mīThī zabāñ dī hai ḳhudā ne

muḳhātab piir se hoñ yā javāñ se

ajab shīrīniyāñ Tapkeñ zabāñ se

vo do ho tiin ho yā chār-harfī

sabhī alfāz goyā taaza barfī

qalam kī saltanat ke haiñ sipāhī

suḳhan hai martabān-e-bālū-shāhī

unheñ nisbat hai goyā bulbuloñ se

mulā.em lafz mīThe gulguloñ se

mohabbat se sabhī ko joḌte haiñ

jalebī jaise shoshe chhoḌte haiñ

diloñ ko un kī jānib log phereñ

ki jaise sham.a ko parvāne ghereñ

paḌosī un ke haiñ muñh-zor bhaa.ī

idhar vo aur udhar saarī ḳhudā.ī

ḳhudā lagtī kabhī kahte nahīñ haiñ

vo ghul-mil kar kabhī rahte nahīñ haiñ

sabhī hamsā.e un ke bolte haiñ

marāsim meñ vo talḳhī gholte haiñ

hamesha pīchhe vo paise ke bhāge

zabāñ tezī meñ hai nashtar se aage

kaleje par chalā kar tiir chhoḌeñ

sabhī ko kar ke vo dil-gīr chhoḌeñ

zabāñ kab vo shakar-āmez karte

vo is mīThe se bhī parhez karte

bachā.e har shanāsā apnā dāman

ki hai bezār vīrāne se gulshan

zafar bhai ko sara shahr jaane

unhen miThi zaban di hai KHuda ne

muKHatab pir se hon ya jawan se

ajab shiriniyan Tapken zaban se

wo do ho tin ho ya chaar-harfi

sabhi alfaz goya taza barfi

qalam ki saltanat ke hain sipahi

suKHan hai martaban-e-baalu-shahi

unhen nisbat hai goya bulbulon se

mulaem lafz miThe gulgulon se

mohabbat se sabhi ko joDte hain

jalebi jaise shoshe chhoDte hain

dilon ko un ki jaanib log pheren

ki jaise shama ko parwane gheren

paDosi un ke hain munh-zor bhai

idhar wo aur udhar sari KHudai

KHuda lagti kabhi kahte nahin hain

wo ghul-mil kar kabhi rahte nahin hain

sabhi hamsae un ke bolte hain

marasim mein wo talKHi gholte hain

hamesha pichhe wo paise ke bhage

zaban tezi mein hai nashtar se aage

kaleje par chala kar tir chhoDen

sabhi ko kar ke wo dil-gir chhoDen

zaban kab wo shakar-amez karte

wo is miThe se bhi parhez karte

bachae har shanasa apna daman

ki hai bezar virane se gulshan