Dor

bādal barkhā nadiyāñ sāgar

sāgar bādal barkhā nadiyāñ

ek Dor kā hissa haiñ

fardā ke sāñche meñ

kal aur aaj yuuñ hī Dhal jaate haiñ

kal aur aaj aur kal aapas meñ

judā nahiñ ho paate haiñ

guzre lamhe ḳhatm nahiñ ho jaate haiñ

merā nazāra merī nazar

mere havāle mere tevar

merā talaffuz merī zabān

merī jihālat merā gyaan

mere taḳhayyul mere ruj.hān

merā piñjrā merī uḌaan

merī chaal aur merā Dhab

merī hastī merī zaat

sab jazbāt aur sab hālāt

TukḌoñ meñ nahīñ baT sakte

merā maazī hāzir hai

merā fardā nāzir hai

kal aaj aur kal aapas meñ

judā nahīñ ho paate haiñ

guzre lamhe ḳhatm nahīñ ho paate haiñ

baadal barkha nadiyan sagar

sagar baadal barkha nadiyan

ek Dor ka hissa hain

farda ke sanche mein

kal aur aaj yun hi Dhal jate hain

kal aur aaj aur kal aapas mein

juda nahin ho pate hain

guzre lamhe KHatm nahin ho jate hain

mera nazara meri nazar

mere hawale mere tewar

mera talaffuz meri zaban

meri jihaalat mera gyan

mere taKHayyul mere rujhan

mera pinjra meri uDan

meri chaal aur mera Dhab

meri hasti meri zat

sab jazbaat aur sab haalat

TukDon mein nahin baT sakte

mera mazi hazir hai

mera farda nazir hai

kal aaj aur kal aapas mein

juda nahin ho pate hain

guzre lamhe KHatm nahin ho pate hain