dost se

hameñ zamāne ke afkār se ġharaz kyā hai

jahāñ meñ ranj-o-masā.ib se kaun bachtā hai

ik aa.e din ke taġhayyur kā naam duniyā hai

hamāre apne ḳhayālāt ranj-o-rāhat haiñ

ai dost aa ki javānī kī yaad meñ gaa.eñ

fasāne ahd-e-mohabbat ke mil ke dohrā.eñ

phir apne par vahī biitā zamāna le aa.eñ

hamārī zindagī raushan hai un fasānoñ se

guloñ kī oT meñ chhuptī huī mulāqāteñ

lajā lajā ke tumhārī vo pyaar kī bāteñ

mire dimāġh pe chhā.ī haiñ vo javāñ rāteñ

hamāre kitne hasīñ ḳhvāb the javānī ke

mire javānī ke ḳhvāboñ meñ muskurāte ho

mire ḳhayāl kī duniyā meñ chhup ke aate ho

mire hasīn irādoñ pe jhūme jaate ho

tumhāre husn se hai zindagī hasīñ merī

hamārā ishq haqīqat meñ jāvedānī hai

hamārī ziist kā har lamha ġhair-fānī hai

hamārī zindagī ik mustaqil kahānī hai

jahāñ ko yaad rahegā hamārā afsāna

hamein zamane ke afkar se gharaz kya hai

jahan mein ranj-o-masaib se kaun bachta hai

ek aae din ke taghayyur ka nam duniya hai

hamare apne KHayalat ranj-o-rahat hain

ai dost aa ki jawani ki yaad mein gaen

fasane ahd-e-mohabbat ke mil ke dohraen

phir apne par wahi bita zamana le aaen

hamari zindagi raushan hai un fasanon se

gulon ki oT mein chhupti hui mulaqaten

laja laja ke tumhaari wo pyar ki baaten

mere dimagh pe chhai hain wo jawan raaten

hamare kitne hasin KHwab the jawani ke

mere jawani ke KHwabon mein muskuraate ho

mere KHayal ki duniya mein chhup ke aate ho

mere hasin iradon pe jhume jate ho

tumhaare husn se hai zindagi hasin meri

hamara ishq haqiqat mein jawedani hai

hamari zist ka har lamha ghair-fani hai

hamari zindagi ek mustaqil kahani hai

jahan ko yaad rahega hamara afsana