drug store

agar maiñ jism huuñ to sar se paañv tak maiñ jism huuñ

agar maiñ ruuh huuñ to phir tamām-tar maiñ ruuh huuñ

ḳhudā se merā silsila vahī hai jo sabā se hai

agar maiñ sabz peḌ huuñ

to ruuh aur jism kī

vo kaun sī hadeñ haiñ fāsloñ meñ jo badal ga.iiñ

zamīn merī kaun hai

chamaktā nīl-gūñ hasīn āsmān kaun hai

jo barg o gul meñ dhīre dhīre jazb ho rahī hai dhuup

zard dhuup kyuuñ mujhe aziiz hai

ye sochtā huuñ sab magar maiñ tāqchoñ meñ band yuuñ

maiñ naam koī DhūñDhtā huuñ aaj apne karb kā

talāsh kar rahā huuñ ek ek pal

qatār-dar-qatār shīshoñ ke is hujūm meñ

vo āsmān kyā huā vo sabz peḌ kyā huā

jigar meñ aag thī magar jigar sufūf ban gayā

jo surḳh thā kabhī mirā lahū sapīd ho gayā

maiñ boTiyoñ meñ kaT gayā

maiñ dhajjiyoñ meñ nuch gayā

yahāñ pe merī raushnī, yahāñ pe merī zindagī

saped, surḳh, zard, nīlgūñ, siyāh, labloñ meñ baT ga.ī

sabā kī rahguzar se duur haT ga.ī

agar main jism hun to sar se panw tak main jism hun

agar main ruh hun to phir tamam-tar main ruh hun

KHuda se mera silsila wahi hai jo saba se hai

agar main sabz peD hun

to ruh aur jism ki

wo kaun si haden hain faslon mein jo badal gain

zamin meri kaun hai

chamakta nil-gun hasin aasman kaun hai

jo barg o gul mein dhire dhire jazb ho rahi hai dhup

zard dhup kyun mujhe aziz hai

ye sochta hun sab magar main taqchon mein band yun

main nam koi DhunDhta hun aaj apne karb ka

talash kar raha hun ek ek pal

qatar-dar-qatar shishon ke is hujum mein

wo aasman kya hua wo sabz peD kya hua

jigar mein aag thi magar jigar sufuf ban gaya

jo surKH tha kabhi mera lahu sapid ho gaya

main boTiyon mein kaT gaya

main dhajjiyon mein nuch gaya

yahan pe meri raushni, yahan pe meri zindagi

saped, surKH, zard, nilgun, siyah, lablon mein baT gai

saba ki rahguzar se dur haT gai