dubli-patli

shagun bharī ḳhvāb se jaḌī hai

zamāna raftār se bañdhā hai

zamāne ko aap zaid kah leñ

bakar ko samjheñ

mujhe samajh leñ yā ḳhud ko kah leñ

zamāna raftār se bañdhā hai

shagun bharī kā vo ḳhvāb vo āftāb raushan hai

jo

ufuq ke muhīt ko rauñdtā nikaltā hai

shab ke isfanj se syāhī nichoḌtā hai

vo niiñd aur niiñd ke añdheroñ kī kokh ko toḌtā hai

vo

vaqt kī yaḳh-ālūda jhiil ko chhedtā hai

to sāniye ubalte haiñ

jaise jaise shagun bharī kī buḳhār vaalī safed āñkhoñ se jaise motī Tapak rahe hoñ

zamāna raftār se bañdhā hai

vo tez raftār jai jai vintī kī rāgnī kī dhunoñ pe raqsāñ hai

maut se be-ḳhabar zamīñ kī nihāyatoñ se varā nikaltā

vo apnī raftār se bañdhā hai

ye kaisī samteñ haiñ jo kahīñ bhī nahīñ nikaltīñ

ye kaisā tūfāñ hai jo musalsal hai

zindagānī mahā-bhañvar hai

zamāna be-jān ek tinkā

koī tarāzū hai

jis kā shāhīñ kahīñ nahīñ hai

zamāna gahrā kuaañ ghaḌī kī 'azīm aur lā-zavāl Tik-Tik

kī laal kaThnā.iyāñ

zamīñ kī nihāyateñ aur

alag kamre meñ khelte be-niyāz bachche aur un kī aayā

sab ek palḌe se juḌ rahe haiñ

aur

ek palḌe meñ dublī-patlī shagun bharī hai

shagun bharī ḳhvāb se jaḌī hai

shagun bhari KHwab se jaDi hai

zamana raftar se bandha hai

zamane ko aap zaid kah len

bakar ko samjhen

mujhe samajh len ya KHud ko kah len

zamana raftar se bandha hai

shagun bhari ka wo KHwab wo aaftab raushan hai

jo

ufuq ke muhit ko raundta nikalta hai

shab ke isfanj se syahi nichoDta hai

wo nind aur nind ke andheron ki kokh ko toDta hai

wo

waqt ki yaKH-aluda jhil ko chhedta hai

to saniye ubalte hain

jaise jaise shagun bhari ki buKHar wali safed aankhon se jaise moti Tapak rahe hon

zamana raftar se bandha hai

wo tez raftar jai jai winti ki ragni ki dhunon pe raqsan hai

maut se be-KHabar zamin ki nihayaton se wara nikalta

wo apni raftar se bandha hai

ye kaisi samten hain jo kahin bhi nahin nikaltin

ye kaisa tufan hai jo musalsal hai

zindagani maha-bhanwar hai

zamana be-jaan ek tinka

koi taraazu hai

jis ka shahin kahin nahin hai

zamana gahra kuan ghaDi ki 'azim aur la-zawal Tik-Tik

ki lal kaThnaiyan

zamin ki nihayaten aur

alag kamre mein khelte be-niyaz bachche aur un ki aaya

sab ek palDe se juD rahe hain

aur

ek palDe mein dubli-patli shagun bhari hai

shagun bhari KHwab se jaDi hai