dukh ki baat

vo din bhī kaise din the

jab terī palkoñ ke saa.e

shaam kī gahrī udāsī ban ke

mirī ruuh meñ jaadū jagāte the

mirī āñkhoñ meñ nīndeñ

tere bāloñ kī tarah aise subuk se jaal bantī thiiñ

ki jo halqa-ba-halqa ḳhvāb-andar-ḳhvāb

anjāne zamānoñ kī gurezāñ sā.atoñ par

abr kī sūrat baraste the

badalte mausamoñ kī tarah tere jism par aalim guzarte the

mirī jaañ to bahār-e-jāvedāñ kā ek mausam thī

jo merī ruuh meñ aayā

mujhe kyuuñ yaad aate haiñ

vo din

javāb na ā.eñge

na ā.eñge to phir kyuuñ yaad aate haiñ

vo din bhī kaise din the

jab merī bedāriyoñ kī sarhadeñ ḳhvāboñ se miltī thiiñ

vo bāteñ jo ki nā-mumkin haiñ mumkin thiiñ

jahāñ bas soch lenā aur ho jaanā barābar thā

tujhe kyā yaad hai vo din

ki jab harf-e-shikāyat kī girah sī paḌ ga.ī thī

mere siine meñ

merī āzurdagī se shaam ke chehre pe zardī thī

maiñ tere paas baiThā sochtā thā

jaane kyā kyā sochtā thā

tujhe kyā yaad hai

tū ne kahā thā

maiñ dil kī baat agar us se bhī

kah saktī to kah detī

ki mere jism meñ do dil dhaḌakte haiñ

tumhāre vāste bhī

jo dushman-e-jāñ hai

wo din bhi kaise din the

jab teri palkon ke sae

sham ki gahri udasi ban ke

meri ruh mein jadu jagate the

meri aankhon mein ninden

tere baalon ki tarah aise subuk se jal banti thin

ki jo halqa-ba-halqa KHwab-andar-KHwab

anjaane zamanon ki gurezan saaton par

abr ki surat baraste the

badalte mausamon ki tarah tere jism par aalim guzarte the

meri jaan to bahaar-e-jawedan ka ek mausam thi

jo meri ruh mein aaya

mujhe kyun yaad aate hain

wo din

jawab na aaenge

na aaenge to phir kyun yaad aate hain

wo din bhi kaise din the

jab meri bedariyon ki sarhaden KHwabon se milti thin

wo baaten jo ki na-mumkin hain mumkin thin

jahan bas soch lena aur ho jaana barabar tha

tujhe kya yaad hai wo din

ki jab harf-e-shikayat ki girah si paD gai thi

mere sine mein

meri aazurdagi se sham ke chehre pe zardi thi

main tere pas baiTha sochta tha

jaane kya kya sochta tha

tujhe kya yaad hai

tu ne kaha tha

main dil ki baat agar us se bhi

kah sakti to kah deti

ki mere jism mein do dil dhaDakte hain

tumhaare waste bhi

jo dushman-e-jaan hai