Dubti kirnen

vo paivasta nigāheñ apne siine meñ utar jaa.eñ

tarastī aatmā ko lamha-bhar to chain aa jaa.e

bikhartī sā.ateñ phir ek nuqta meñ simaT jaa.eñ

machaltī chāñdī kohsār ke dāman pe lahrā.e

falak ke nīlgūñ sāgar sarāpā nuur ban jaa.eñ

magar maiñ ne sunā hai chāñdnī jab yuuñ utartī hai

to niile pāniyoñ meñ gūñjtī maujeñ ulajhtī haiñ

ujāle tīrgī se aa lipaTte haiñ to ujle pairahan bhī bhiig jaate haiñ

kahīñ aisā na ho koī ubhartī mauj bal khātī dāman bhigo de

aur maiñ mahrūmiyoñ kī kashtiyoñ meñ sāhiloñ se duur ho jā.ūñ

ye ḳhadsha barmalā lekin vo sharmīlī nigāheñ rāhat-e-jāñ haiñ

simaTtī haiñ to kaale pāniyoñ kā ḳhauf baḌhtā hai

bikhartī haiñ to sho.ale se lapakte haiñ

vo yaḳh-basta nigāheñ sard rātoñ kī tarah

mere lahū kī chāñdnī se ḳhvāb kī sūrat gurezāñ

tah-ba-tah tārīkiyoñ meñ raushnī kī ik karan jaise

biphartī lahar ke girdāb meñ be-bādbāñ kashtī

kisī kā shāna-e-sahrā meñ bahtā ḳhūb-sūrat phuul

murjhāne se pahle dil-e-girafta

ḳhvāhishoñ meñ zard pattoñ sī udāsī

hasrateñ takmīl kī jhankār se aarī

muqaddar ḳhūn-āshāmī

wo paiwasta nigahen apne sine mein utar jaen

tarasti aatma ko lamha-bhar to chain aa jae

bikharti saaten phir ek nuqta mein simaT jaen

machalti chandi kohsar ke daman pe lahrae

falak ke nilgun sagar sarapa nur ban jaen

magar main ne suna hai chandni jab yun utarti hai

to nile paniyon mein gunjti maujen ulajhti hain

ujale tirgi se aa lipaTte hain to ujle pairahan bhi bhig jate hain

kahin aisa na ho koi ubharti mauj bal khati daman bhigo de

aur main mahrumiyon ki kashtiyon mein sahilon se dur ho jaun

ye KHadsha barmala lekin wo sharmili nigahen rahat-e-jaan hain

simaTti hain to kale paniyon ka KHauf baDhta hai

bikharti hain to shoale se lapakte hain

wo yaKH-basta nigahen sard raaton ki tarah

mere lahu ki chandni se KHwab ki surat gurezan

tah-ba-tah tarikiyon mein raushni ki ek karan jaise

bipharti lahar ke girdab mein be-baadban kashti

kisi ka shana-e-sahra mein bahta KHub-surat phul

murjhane se pahle dil-e-girafta

KHwahishon mein zard patton si udasi

hasraten takmil ki jhankar se aari

muqaddar KHun-ashami