duri

ammī abbā kaise haiñ

TeḌhe haiñ yā sīdhe haiñ

gum-sum rahne vaale haiñ

bāteñ karne vaale haiñ

zehn-o-dil ke kaise haiñ

garm haiñ yā phir ThanDe haiñ

pyaar luTāne vaale haiñ

aañkh dikhāne vaale haiñ

naaz uThāne vaale haiñ

DaañT pilāne vaale haiñ

dillī meñ kyoñ rahte haiñ

dillī meñ kyā karte haiñ

khānā kaun banātā hai

un ko kaun khilātā hai

kin se bāteñ karte haiñ

kin kī bāteñ sunte haiñ

tanhā kaise rahte haiñ

tanhā.ī kyoñ sahte haiñ

kyoñ sunday meñ aate haiñ

uncle jaise lagte haiñ

sunday meñ bhī sote haiñ

chhuTTī ko bhī khote haiñ

ammī un se bolo nā

hoñT zarā tum kholo nā

bolo un se paas raheñ

ham se bhī kuchh baat kareñ

ham logoñ kā haal suneñ

apnī koī baat kaheñ

bolo nā ki chust raheñ

aise bhī na sust raheñ

ham ko le kar shahr chaleñ

ghūmeñ phireñ aur mauj kareñ

ham meñ kaisī duurī hai

ye kaisī majbūrī hai

ammi abba kaise hain

TeDhe hain ya sidhe hain

gum-sum rahne wale hain

baaten karne wale hain

zehn-o-dil ke kaise hain

garm hain ya phir ThanDe hain

pyar luTane wale hain

aankh dikhane wale hain

naz uThane wale hain

DanT pilane wale hain

dilli mein kyon rahte hain

dilli mein kya karte hain

khana kaun banata hai

un ko kaun khilata hai

kin se baaten karte hain

kin ki baaten sunte hain

tanha kaise rahte hain

tanhai kyon sahte hain

kyon sunday mein aate hain

uncle jaise lagte hain

sunday mein bhi sote hain

chhuTTi ko bhi khote hain

ammi un se bolo na

honT zara tum kholo na

bolo un se pas rahen

hum se bhi kuchh baat karen

hum logon ka haal sunen

apni koi baat kahen

bolo na ki chust rahen

aise bhi na sust rahen

hum ko le kar shahr chalen

ghumen phiren aur mauj karen

hum mein kaisi duri hai

ye kaisi majburi hai