duri

dahshat-e-fardā nahīñ hai dosh kā mātam nahīñ

phuul merī aañkh kā minnat-kash-e-shabnam nahīñ

terā ġham jab dil meñ baaqī hai to koī ġham nahīñ

sub.h-e-nazzāra se shab-hā-e-judā.ī kam nahīñ

ishq hai to koī mausam hijr kā mausam nahīñ

tū nahīñ to kyā tasavvur kī fusūñ-kārī to hai

din ke hangāme to haiñ rātoñ kī bedārī to hai

husn ke chashmoñ se faiz-e-dilbarī jaarī to hai

saf.ha-e-taḳh.īl par yādoñ kī gul-kārī to hai

kaun sā aalam hai jo dīdār kā aalam nahīñ

zehn meñ haiñ zinda vo guzre hue ayyām abhī

jhilmilāte haiñ tasavvur meñ vo sub.h-o-shām abhī

raqs meñ paimāna hai ḳhālī nahīñ haiñ jaam abhī

dil hai sarmast-e-ḳhumār-e-bāda-e-gulfām abhī

ek lamhe ko bhī bazm-e-ārzū barham nahīñ

tere ġham se yuuñ qarār-e-zīst hai hāsil mujhe

chain se nā-āshnā rakhtā hai soz-e-dil mujhe

dard ne jaanā hai lutf-e-ḳhās ke qābil mujhe

tū ne kar rakkhā thā apne aap se ġhāfil mujhe

duur hoñ tujh se to koī chiiz bhī mub.ham nahīñ

dahshat-e-farda nahin hai dosh ka matam nahin

phul meri aankh ka minnat-kash-e-shabnam nahin

tera gham jab dil mein baqi hai to koi gham nahin

subh-e-nazzara se shab-ha-e-judai kam nahin

ishq hai to koi mausam hijr ka mausam nahin

tu nahin to kya tasawwur ki fusun-kari to hai

din ke hangame to hain raaton ki bedari to hai

husn ke chashmon se faiz-e-dilbari jari to hai

safha-e-taKHil par yaadon ki gul-kari to hai

kaun sa aalam hai jo didar ka aalam nahin

zehn mein hain zinda wo guzre hue ayyam abhi

jhilmilate hain tasawwur mein wo subh-o-sham abhi

raqs mein paimana hai KHali nahin hain jam abhi

dil hai sarmast-e-KHumar-e-baada-e-gulfam abhi

ek lamhe ko bhi bazm-e-arzu barham nahin

tere gham se yun qarar-e-zist hai hasil mujhe

chain se na-ashna rakhta hai soz-e-dil mujhe

dard ne jaana hai lutf-e-KHas ke qabil mujhe

tu ne kar rakkha tha apne aap se ghafil mujhe

dur hon tujh se to koi chiz bhi mubham nahin