dusri nazm

siyāh rātoñ ke be amaañ rāstoñ pe chhiTke hue ye chehre

ki jaise patjhaḌ meñ bikhar ga.e hoñ

bas in kī bechain zaḳhm-ḳhurda sī putliyoñ meñ raqam hai baaqī

jo ghūmtī haiñ jo muntazir haiñ

mare zamāne meñ phal nahīñ haiñ faqat aḳhzāñ ke zavāl haiñ aur aise tūfāñ ki dekhte dekhte hazāroñ

daraḳht jaḌ se ukhaḌ ga.e haiñ ummīd nā-āshnā diloñ meñ

jo dard hai raaz bin chukā hai, jo lafz haiñ ujaḌ rahe haiñ

mujhe is apnī ḳhizāñ meñ jo chiiz yaad hai vo har ek rāste

maiñ an-ginat putliyoñ kī gardish kā karb jaise

hazār-hā mom-battiyāñ jo mire badan aur merī āñkhoñ

ko chhū kar ke bujhtī huuñ aur añdhere ko mere andar utārtī huuñ

ye putliyāñ jin meñ ghūmte aur Dūbte haiñ sabhī sitāre

ye āsmānoñ ke takne vaale tabāh chehre

niDhāl ke tajarbe ko muraqqaoñ meñ saf ba saf muntazir haiñ meñh ke

jo un kī pāmāliyoñ ko dho kar safed kar de

jale bujhe aur ḳhaam rañgoñ kī chīq-lish se jagah jagah shiq

ye marg amboh jis kī tā meñ dabī huī aag kī harārat

hai āḳhirī faisloñ kā mausam ki ā.īna vaar meñ yahāñ pe

ḳhud apne chehre ko DhūñDhtā phir rahā huuñ shāyad kho chukā huuñ

shāyad aaj bhī

sub.h huī aur na.ī na.ī ummīdeñ jāgeñ

shāyad aaj bhī sūraj apnī puurī tābānī se chamke

shāyad dil moh lene vaalī koī sūrat jaate jaate

muḌ kar dekhe

rūkhī sūkhī bhī ne.amat se baḌh kar maza de

shāyad aaj bhī koī mujhe phir paas biThā le

an-honī mīrās yahī haiñ duniyā bhar kī ma.amūlī bāteñ

har din kitnā nayā magar utnā hī purānā

vahī haiñ saare raste aur gardish meñ āñkheñ

sūiyāñ aur miTTī ke pyāle

sadā hī mañgte haath kabhī na thakte paañv

bar juuñ vaale shahr sabhī makḌī ke jaale

aur miTTī kī nañgī bhūkī sadiyoñ gaañv

shāyad aaj bhī pal do pal ko

duniyā kī har baat lage jaise in mil bejoḌ fasāna

aag kī koñpal jaisī sub.h meñ

kaun sirhāne baiThā mujh se

hañs hañs kar bāteñ kartā hai

kitnā raushan ḳhvāb ye mere saath uThā hai

kahne ko dekhā hai kyā kyā

lekin phir bhī

jaane kyā kuchh dar-parda hai

shāyad aaj samajh meñ aa.e kyā dekhā hai kyā dhokā hai

kitnī ummīdoñ par qaa.em

hai ye duniyā aur yahīñ par

kisī taraf konoñ khudroñ meñ

apnī havā meñ ham bhī tum bhī

jaise aaj ho sab kuchh daa.im

ek zarā jī bahlā to phir kyā kyā kuchh lagtā hai sachchā

saare jaal suhāne saarā yahāñ kā karnā bharnā achchhā

shāyad aaj bhī

siyah raaton ke be aman raston pe chhiTke hue ye chehre

ki jaise patjhaD mein bikhar gae hon

bas in ki bechain zaKHm-KHurda si putliyon mein raqam hai baqi

jo ghumti hain jo muntazir hain

mare zamane mein phal nahin hain faqat aKHzan ke zawal hain aur aise tufan ki dekhte dekhte hazaron

daraKHt jaD se ukhaD gae hain ummid na-ashna dilon mein

jo dard hai raaz bin chuka hai, jo lafz hain ujaD rahe hain

mujhe is apni KHizan mein jo chiz yaad hai wo har ek raste

main an-ginat putliyon ki gardish ka karb jaise

hazar-ha mom-battiyan jo mere badan aur meri aankhon

ko chhu kar ke bujhti hun aur andhere ko mere andar utarti hun

ye putliyan jin mein ghumte aur Dubte hain sabhi sitare

ye aasmanon ke takne wale tabah chehre

niDhaal ke tajarbe ko muraqqaon mein saf ba saf muntazir hain meinh ke

jo un ki pamaliyon ko dho kar safed kar de

jale bujhe aur KHam rangon ki chiq-lish se jagah jagah shiq

ye marg amboh jis ki ta mein dabi hui aag ki hararat

hai aaKHiri faislon ka mausam ki aaina war mein yahan pe

KHud apne chehre ko DhunDhta phir raha hun shayad kho chuka hun

shayad aaj bhi

subh hui aur nai nai ummiden jagen

shayad aaj bhi suraj apni puri tabani se chamke

shayad dil moh lene wali koi surat jate jate

muD kar dekhe

rukhi sukhi bhi neamat se baDh kar maza de

shayad aaj bhi koi mujhe phir pas biTha le

an-honi miras yahi hain duniya bhar ki mamuli baaten

har din kitna naya magar utna hi purana

wahi hain sare raste aur gardish mein aankhen

suiyan aur miTTi ke pyale

sada hi mangte hath kabhi na thakte panw

bar jun wale shahr sabhi makDi ke jale

aur miTTi ki nangi bhuki sadiyon ganw

shayad aaj bhi pal do pal ko

duniya ki har baat lage jaise in mil bejoD fasana

aag ki konpal jaisi subh mein

kaun sirhane baiTha mujh se

hans hans kar baaten karta hai

kitna raushan KHwab ye mere sath uTha hai

kahne ko dekha hai kya kya

lekin phir bhi

jaane kya kuchh dar-parda hai

shayad aaj samajh mein aae kya dekha hai kya dhoka hai

kitni ummidon par qaem

hai ye duniya aur yahin par

kisi taraf konon khudron mein

apni hawa mein hum bhi tum bhi

jaise aaj ho sab kuchh daim

ek zara ji bahla to phir kya kya kuchh lagta hai sachcha

sare jal suhane sara yahan ka karna bharna achchha

shayad aaj bhi