etiraf

har shāḳh-e-tamannā par merī har-chand ki barg-o-bār lage

vo peḌ jo mere naam kā hai, har aañkh ko sāya-dār lage

par, ek kamī sī rahtī hai

kuchh vaqf-e-tabassum hoñT bhī haiñ, kuchh rasta taktī āñkheñ bhī

kuchh vo haiñ jin se milne ko be-tāb hoñ merī bāñheñ bhī

par, ek ḳhalish sī rahtī hai

ye dād-o-satā.ish ke tamġhe, kuchh she.roñ par, kuchh kāmoñ par

aur itnā istehqāq bhī jo hotā hai sub.hoñ shāmoñ par

par, ik mahrūmī rahtī hai

jo ik mahrūmī, ek ḳhalish jo ek kamī sī rahtī hai

vo ek kamī, vo ek ḳhalish, vo ik mahrūmī tum hī to ho

har shaKH-e-tamanna par meri har-chand ki barg-o-bar lage

wo peD jo mere nam ka hai, har aankh ko saya-dar lage

par, ek kami si rahti hai

kuchh waqf-e-tabassum honT bhi hain, kuchh rasta takti aankhen bhi

kuchh wo hain jin se milne ko be-tab hon meri banhen bhi

par, ek KHalish si rahti hai

ye dad-o-sataish ke tamghe, kuchh sheron par, kuchh kaamon par

aur itna istehqaq bhi jo hota hai subhon shamon par

par, ek mahrumi rahti hai

jo ek mahrumi, ek KHalish jo ek kami si rahti hai

wo ek kami, wo ek KHalish, wo ek mahrumi tum hi to ho