fankar

maiñ ne jo giit tire pyaar kī ḳhātir likkhe

aaj un gītoñ ko bāzār meñ le aayā huuñ

aaj dukkān pe nīlām uThegā un kā

tū ne jin gītoñ pe rakhī thī mohabbat kī asaas

aaj chāñdī ke tarāzū meñ tulegī har chiiz

mere afkār mirī shā.irī merā ehsās

jo tirī zaat se mansūb the un gītoñ ko

muflisī jins banāne pe utar aa.ī hai

bhuuk tere ruḳh-e-rañgīñ ke fasānoñ ke evaz

chand ashiyā-e-zarūrat kī tamannā.ī hai

dekh is arsa-e-gah-e-mehnat-o-sarmāya meñ

mere naġhme bhī mire paas nahīñ rah sakte

tere jalve kisī zardār kī mīrās sahī

tere ḳhāke bhī mire paas nahīñ rah sakte

aaj un gītoñ ko bāzār meñ le aayā huuñ

maiñ ne jo giit tire pyaar kī ḳhātir likkhe

main ne jo git tere pyar ki KHatir likkhe

aaj un giton ko bazar mein le aaya hun

aaj dukkan pe nilam uThega un ka

tu ne jin giton pe rakhi thi mohabbat ki asas

aaj chandi ke taraazu mein tulegi har chiz

mere afkar meri shairi mera ehsas

jo teri zat se mansub the un giton ko

muflisi jins banane pe utar aai hai

bhuk tere ruKH-e-rangin ke fasanon ke ewaz

chand ashiya-e-zarurat ki tamannai hai

dekh is arsa-e-gah-e-mehnat-o-sarmaya mein

mere naghme bhi mere pas nahin rah sakte

tere jalwe kisi zardar ki miras sahi

tere KHake bhi mere pas nahin rah sakte

aaj un giton ko bazar mein le aaya hun

main ne jo git tere pyar ki KHatir likkhe