ehsan faramosh

Dūbne se jab bachāyā maiñ ne un ko tair ke

to visiting card apnā de ke vo kahne lage

shukriya mumkin nahīñ hai aap ke ehsān kā

phir bhī mujh se is pate par aap miliyegā zarā

dekhte hī card un kā khil gayā dil kā gulāb

chief editor the literary risāle ke janāb

dūsre din un se milne jab maiñ daftar meñ gayā

saath sofe par biThāyā chaa.e kā order diyā

phir kahā ye de ke mujh ko ek moTī sī raqam

gar qubūl uftad zahe izz-o-sharaf ai mohtaram

maiñ ne vāpas kī raqam kah ke ki hazrat shukriya

apnī ġhazloñ kā pulanda un ke aage rakh diyā

paḌh ke vo ġhazloñ ko merī bole ye tahqīr se

aap to shā.ir baḌe haiñ 'shād' 'ġhālib' 'mīr' se

'jām.ī' sāhab zarā ik aur ehsāñ kījiye

ab mujhe tālāb hī meñ Duub marne dījiye

Dubne se jab bachaya main ne un ko tair ke

to wisiting card apna de ke wo kahne lage

shukriya mumkin nahin hai aap ke ehsan ka

phir bhi mujh se is pate par aap miliyega zara

dekhte hi card un ka khil gaya dil ka gulab

chief editor the literary risale ke janab

dusre din un se milne jab main daftar mein gaya

sath sofe par biThaya chae ka order diya

phir kaha ye de ke mujh ko ek moTi si raqam

gar qubul uftad zahe izz-o-sharaf ai mohtaram

main ne wapas ki raqam kah ke ki hazrat shukriya

apni ghazlon ka pulanda un ke aage rakh diya

paDh ke wo ghazlon ko meri bole ye tahqir se

aap to shair baDe hain 'shad' 'ghaalib' 'mir' se

'jami' sahab zara ek aur ehsan kijiye

ab mujhe talab hi mein Dub marne dijiye