ehtijaj

mujhe terī mohabbat kī qasam aisā na honā thā

ġham-e-darmāñ kasīr aur dard kam aisā na honā thā

amīroñ ko nisāb-e-sīm-o-zar muflis tahī-dāman

tirā dast-e-karam abr-e-karam aisā na honā thā

kahīñ dahqāñ ke siine par haiñ mohreñ fāqa-mastī kī

kahīñ taḳht-e-sikandar jāh-e-jam aisā na honā thā

kahīñ changez ke hoñToñ pe mauj-e-ḳhanda-e-rangīñ

kahīñ mazlūm kī āñkhoñ meñ nam aisā na honā thā

jabīn-e-shauq ko sajdoñ se fursat hī nahīñ miltī

kam-az-kam husn kā naqsh-e-qadam aisā na honā thā

riyā-kārī kā parcham lahlahā.e ḳhānqāhoñ par

nigūñ-sar ishq-o-mastī kā alam aisā na honā thā

hazāroñ saal guzre haiñ abhī tak terī duniyā meñ

vahī hangāma-e-lā-o-na'am aisā na honā thā

latāfat be-kasāfat kuchh nahīñ maanā magar yā-rab

sanam-ḳhāne meñ buniyād-e-haram aisā na honā thā

agar paidā hī karnā thā mujhe behis ġhulāmoñ meñ

to phir merī navā kā zer-o-bam aisā na honā thā

mujhe pās-e-ubūdiyyat hai lekin ye bhī kahne de

jahāñ terī ḳhudā.ī kī qasam aisā na honā thā

mujhe teri mohabbat ki qasam aisa na hona tha

gham-e-darman kasir aur dard kam aisa na hona tha

amiron ko nisab-e-sim-o-zar muflis tahi-daman

tera dast-e-karam abr-e-karam aisa na hona tha

kahin dahqan ke sine par hain mohren faqa-masti ki

kahin taKHt-e-sikandar jah-e-jam aisa na hona tha

kahin changez ke honTon pe mauj-e-KHanda-e-rangin

kahin mazlum ki aankhon mein nam aisa na hona tha

jabin-e-shauq ko sajdon se fursat hi nahin milti

kam-az-kam husn ka naqsh-e-qadam aisa na hona tha

riya-kari ka parcham lahlahae KHanqahon par

nigun-sar ishq-o-masti ka alam aisa na hona tha

hazaron sal guzre hain abhi tak teri duniya mein

wahi hangama-e-la-o-na'am aisa na hona tha

latafat be-kasafat kuchh nahin mana magar ya-rab

sanam-KHane mein buniyaad-e-haram aisa na hona tha

agar paida hi karna tha mujhe behis ghulamon mein

to phir meri nawa ka zer-o-bam aisa na hona tha

mujhe pas-e-ubudiyyat hai lekin ye bhi kahne de

jahan teri KHudai ki qasam aisa na hona tha