ek aur barsat

kal raat zoroñ kī barsāt thī

āñkhoñ ke āsmān par bhī

yādoñ ke bādal chhā.e the

barsāt kī būñdeñ

aur āñkhoñ ke bādal

saath saath raat bhar baraste rahe

maano har barastī buuñd

ḳhāmoshiyoñ ko toḌtā huā

ek lafz ban ga.ī thī

donoñ ke beach guftugū

raat bhar huī thī

sub.h dekhā

āsmān saaf thā

vo khul kar muskurā rahā thā

maano us ke saare gile shikve

bah ga.e the

magar

āñkhoñ ke bādal

ab bhī jyuuñ ke tyuuñ the

vo barse to the magar

har buuñd jaise

dil ke sāgar meñ utar ga.ī thī

aur ek baar phir

dil se āñkhoñ tak kā safar tai karne ke liye

use intizār thā

to sirf

ek aur barsāt kā

kal raat zoron ki barsat thi

aankhon ke aasman par bhi

yaadon ke baadal chhae the

barsat ki bunden

aur aankhon ke baadal

sath sath raat bhar baraste rahe

mano har barasti bund

KHamoshiyon ko toDta hua

ek lafz ban gai thi

donon ke beach guftugu

raat bhar hui thi

subh dekha

aasman saf tha

wo khul kar muskura raha tha

mano us ke sare gile shikwe

bah gae the

magar

aankhon ke baadal

ab bhi jyun ke tyun the

wo barse to the magar

har bund jaise

dil ke sagar mein utar gai thi

aur ek bar phir

dil se aankhon tak ka safar tai karne ke liye

use intizar tha

to sirf

ek aur barsat ka