ek aur muhabbat

baat sirf itnī thī

ham apne farsūda jazboñ ke kāTh-kabāḌ ko bhī

ujle lafzoñ ke show-casoñ meñ sajā kar ham-kalāmī karte the

jaane kitne jismoñ ke visāl se hote hue

ek dūsre ke qarīb pahuñche the ham...!

hamārī dhulī-dhulā.ī jholiyoñ meñ jugālī kiye hue

bosoñ kī saḌāñd thī

hamāre lams ḳhudā ko chhūne kī ḳhvāhish meñ maile ho rahe the

hatheliyoñ kī chingīr meñ paḌe baasī duāoñ ke nivāle

ham se nigle na jaate the

lahū thoktī huī mohabbat ham se bichhaḌ rahī thī

aur ham muñh pher kar use ruḳhsat ke do āñsuoñ kā namak

tak na de pā rahe the

rishta, sachchā iz.hār māñgtā thā

aur hamāre paas apnī rafāqatoñ kī ta.aziyat ke liye bhī

do lafzoñ kī taufīq na thī

baat sirf itnī thī ki...

hamārī rūheñ ek dūsre se muāvanat nahīñ kar pā.īñ thiiñ

yā phir shāyad...

hamāre paas ek aur mohabbat kī gunjā.ish hī nahīñ thii!

baat sirf itni thi

hum apne farsuda jazbon ke kaTh-kabaD ko bhi

ujle lafzon ke show-cason mein saja kar ham-kalami karte the

jaane kitne jismon ke visal se hote hue

ek dusre ke qarib pahunche the ham!

hamari dhuli-dhulai jholiyon mein jugali kiye hue

boson ki saDand thi

hamare lams KHuda ko chhune ki KHwahish mein maile ho rahe the

hatheliyon ki chingir mein paDe basi duaon ke niwale

hum se nigle na jate the

lahu thokti hui mohabbat hum se bichhaD rahi thi

aur hum munh pher kar use ruKHsat ke do aansuon ka namak

tak na de pa rahe the

rishta, sachcha izhaar mangta tha

aur hamare pas apni rafaqaton ki taziyat ke liye bhi

do lafzon ki taufiq na thi

baat sirf itni thi ki

hamari ruhen ek dusre se muawanat nahin kar pain thin

ya phir shayad

hamare pas ek aur mohabbat ki gunjaish hi nahin thi!