ek cancer ke mariz ki baD-baD

gale par lagā kar nishāñ

jis ghaḌī doctor ne ye mujh se kahā

aur to saare parhez ḳhatm aap ke aaj se

shave mat kījiyegā

jab talak ye gale kī sekā.ī chale

shave mat kījiyegā

to saarī mashiyyat ḳhudā kī samajh meñ mire aa ga.ī

are

mujh ko dāḌhī se inkār kab thā jo ye ruḳh nikālā gayā

maiñ to ḳhud shave ke naam se

yuuñ bidaktā rahā aaj tak jaise paanī se billī

haañ mirī saas ko kuchh zarūr etarāzāt the

jin kī izzat kī ḳhātir

maiñ dāḌhī nahīñ rakh sakā

magar un ko bhī maiñ

agar vaqt miltā to samjhā hī letā

ḳhair

ab to jo honā thā ho hī gayā

yuuñ bhī kis ko bhalā koī mauqā milā hai ḳhudā ke huzūr

baat rakhne kī apnī

to ye baat hai

yaanī maiñ

shakl se pakkā sachchā musalmāñ na lagne ke shak meñ gayā

gale par laga kar nishan

jis ghaDi doctor ne ye mujh se kaha

aur to sare parhez KHatm aap ke aaj se

shawe mat kijiyega

jab talak ye gale ki sekai chale

shawe mat kijiyega

to sari mashiyyat KHuda ki samajh mein mere aa gai

are

mujh ko daDhi se inkar kab tha jo ye ruKH nikala gaya

main to KHud shawe ke nam se

yun bidakta raha aaj tak jaise pani se billi

han meri sas ko kuchh zarur etaraazat the

jin ki izzat ki KHatir

main daDhi nahin rakh saka

magar un ko bhi main

agar waqt milta to samjha hi leta

KHair

ab to jo hona tha ho hi gaya

yun bhi kis ko bhala koi mauqa mila hai KHuda ke huzur

baat rakhne ki apni

to ye baat hai

yani main

shakl se pakka sachcha musalman na lagne ke shak mein gaya