ek desi hasina se mulaqat

sub-way meñ nazar aa.ī mujhe ek hasīna

ruusī nazar aatī thī haqīqat meñ thī chīnā

andar kī fazā aur thī bāhar kī fazā aur

maada thī magar chaal se lagtī thī narīna

bolī ki mujhe log pukārā kiye mary

daddy ne mirā naam to rakhā thā marīna

shalvār ko nekar kiyā banyān ko rūmāl

maiñ rāh-e-taraqqī pe chaḌhī zīna-ba-zīna

ab mujh ko dupaTTe kī zarūrat hī nahīñ hai

maġhrib ne sikhāyā mujhe jiine kā qarīna

maiñ ek hī andāz ke kapḌoñ meñ milūñgī

ho june kā session ki december kā mahīna

desī thī magar ruup meñ kaalī kī tarah thī

vo garm bahut chaa.e kī pyālī kī tarah thī

pistol kī tarah aañkh to golī kī tarah hoñT

aur naak to bandūq kī naalī kī tarah thī

aa.ī thī yahāñ zulf-e-girah-gīr kaTā kar

mashriq kī havā bād-e-shumālī kī tarah thī

us kā bhī na thā merī tarah koī bharosa

beñgan kī tarah maiñ huuñ vo thālī kī tarah thī

har uzv-e-badan misra-e-ġhālib kī tarah thā

chehre kī chamak matla-e-hālī kī tarah thī

sub-way mein nazar aai mujhe ek hasina

rusi nazar aati thi haqiqat mein thi china

andar ki faza aur thi bahar ki faza aur

mada thi magar chaal se lagti thi narina

boli ki mujhe log pukara kiye mary

daddy ne mera nam to rakha tha marina

shalwar ko nekar kiya banyan ko rumal

main rah-e-taraqqi pe chaDhi zina-ba-zina

ab mujh ko dupaTTe ki zarurat hi nahin hai

maghrib ne sikhaya mujhe jine ka qarina

main ek hi andaz ke kapDon mein milungi

ho june ka session ki december ka mahina

desi thi magar rup mein kali ki tarah thi

wo garm bahut chae ki pyali ki tarah thi

pistol ki tarah aankh to goli ki tarah honT

aur nak to banduq ki nali ki tarah thi

aai thi yahan zulf-e-girah-gir kaTa kar

mashriq ki hawa baad-e-shumali ki tarah thi

us ka bhi na tha meri tarah koi bharosa

bengan ki tarah main hun wo thaali ki tarah thi

har uzw-e-badan misra-e-ghaalib ki tarah tha

chehre ki chamak matla-e-haali ki tarah thi