ek kahani

pahāḌoñ se ghirī vaadī meñ, patthar se banī ik chār-dīvārī

aur is dīvār ke andar ka.ī kamre

hazāroñ saal kī vīrāniyāñ oḌhe khaḌe haiñ

inhī vīrān kamroñ meñ se ik kamrā

jahāñ tiin aadmī ik chārpā.ī par

ḳhud apne-āp se bāhar nikal kar is tarah baiThe hue haiñ

jaise apne aap meñ the hī nahīñ

vo tiin haiñ

bas tiin

aur chauthā mujassama hai

jo bāhar īstāda hai

har ik shai par añdhere

aur añdhere par sisaktī ḳhāmushī kā ḳhauf taarī hai

magar vo tīnoñ raushan haiñ

mukammal taur par raushan

na un par ḳhauf kā saaya

na koī huzn kī parchhā.īñ

vo bāteñ kar rahe haiñ

aur havā sākit khaḌī hai

gosh-bar-āvāz

lekin un kī bāteñ be-sadā haiñ

nā-gahāñ un tiin meñ se ek kī nazreñ havā kī samt uThtī haiñ

to vo ghabrā ke phir se chalne lagtī hai

havā chalte hī un kī guftugū āvāz meñ tabdīl hotī hai

aur us kī tez lahreñ sehn kī jānib lapaktī haiñ

to ik saaya sā lahrātā hai

saaya dekh kar un tiin meñ se ek

maare ḳhauf ke apne badan ko oḌh letā hai...

dūsre din sub.h jab ḳhurshīd kī kirnoñ ne darvāze pe dastak dī

to kamre meñ vo do the

aur...

bāhar do mujassame

pahaDon se ghiri wadi mein, patthar se bani ek chaar-diwari

aur is diwar ke andar kai kamre

hazaron sal ki viraniyan oDhe khaDe hain

inhi viran kamron mein se ek kamra

jahan tin aadmi ek chaarpai par

KHud apne-ap se bahar nikal kar is tarah baiThe hue hain

jaise apne aap mein the hi nahin

wo tin hain

bas tin

aur chautha mujassama hai

jo bahar istada hai

har ek shai par andhere

aur andhere par sisakti KHamushi ka KHauf tari hai

magar wo tinon raushan hain

mukammal taur par raushan

na un par KHauf ka saya

na koi huzn ki parchhain

wo baaten kar rahe hain

aur hawa sakit khaDi hai

gosh-bar-awaz

lekin un ki baaten be-sada hain

na-gahan un tin mein se ek ki nazren hawa ki samt uThti hain

to wo ghabra ke phir se chalne lagti hai

hawa chalte hi un ki guftugu aawaz mein tabdil hoti hai

aur us ki tez lahren sehn ki jaanib lapakti hain

to ek saya sa lahraata hai

saya dekh kar un tin mein se ek

mare KHauf ke apne badan ko oDh leta hai

dusre din subh jab KHurshid ki kirnon ne darwaze pe dastak di

to kamre mein wo do the

aur

bahar do mujassame