ek manzum KHat

bhaa.ī

aisī nazm ab likhkhūñ kaise

isyāñ kī bāteñ hoñ jis meñ

yā aisī laḌkī kā qissa

paikar ho jis husn kā

jis ke tīr-e-nigāh se

siina koī huā ho zaḳhmī

aur phir

vasl kī aas meñ

jazbe us ke phisle hoñ to

aisī nazm ab likhkhūñ kaise

yā phir jis meñ

aisī laḌkī kā qissa ho

jis ne kisī kī havas ko pāgal sā ho banāyā

jis kī gahrī jhiil meñ bhaa.ī

us ne utar kar

pyaas bujhānī chāhī ho

jab aisī nazmeñ likh kar shā.ir

ḳhud ko bhī uryāñ kartā ho

aisī nazmeñ likhkhūñ kaise

aisī nazmeñ likhne par to

tauba kī bhī hājat hogī

bhaa.ī ab to

umr kī us sarhad par huuñ maiñ

jis ke baad jahannum hogā

jis meñ patthar aur paanī kā

aag ugaltā aur ubaltā

ek bhayānak manzar hogā

jis kā koī ant na hogā

aisā ātishnāk sā dariyā

lambā chauḌā shor machātā bahtā hogā

jis kā rang bhī kaalā hogā

jāñ-farsā nazzāra hogā

uf vo jaane kaisā hogā

vahīñ pe lekin

bulandiyoñ par jannat hogī

jis kī ārā.ish kī

koī had bhī na hogī

har-sū hogī rab kī tajallī

dil ko masarrat baḳhshne vaalā

manzar bhī lā-sānī hogā

mere nasīb meñ kyā likkhā hai

kaise jānūñ

allah jaane tab kyā hogā

maiñ us din kī tayyārī meñ

masrūf huuñ bhaa.ī

nā-mumkin hai jis se rihā.ī

ya.anī jiite jī hī ik din

sach kā ye talḳhāba-e-shīrīñ

har zī-rūh ko piinā hogā

maut kā zā.iqa chakhnā hogā

bhai

aisi nazm ab likhkhun kaise

isyan ki baaten hon jis mein

ya aisi laDki ka qissa

paikar ho jis husn ka

jis ke tir-e-nigah se

sina koi hua ho zaKHmi

aur phir

wasl ki aas mein

jazbe us ke phisle hon to

aisi nazm ab likhkhun kaise

ya phir jis mein

aisi laDki ka qissa ho

jis ne kisi ki hawas ko pagal sa ho banaya

jis ki gahri jhil mein bhai

us ne utar kar

pyas bujhani chahi ho

jab aisi nazmen likh kar shair

KHud ko bhi uryan karta ho

aisi nazmen likhkhun kaise

aisi nazmen likhne par to

tauba ki bhi hajat hogi

bhai ab to

umr ki us sarhad par hun main

jis ke baad jahannum hoga

jis mein patthar aur pani ka

aag ugalta aur ubalta

ek bhayanak manzar hoga

jis ka koi ant na hoga

aisa aatishnak sa dariya

lamba chauDa shor machata bahta hoga

jis ka rang bhi kala hoga

jaan-farsa nazzara hoga

uf wo jaane kaisa hoga

wahin pe lekin

bulandiyon par jannat hogi

jis ki aaraish ki

koi had bhi na hogi

har-su hogi rab ki tajalli

dil ko masarrat baKHshne wala

manzar bhi la-sani hoga

mere nasib mein kya likkha hai

kaise jaanun

allah jaane tab kya hoga

main us din ki tayyari mein

masruf hun bhai

na-mumkin hai jis se rihai

yani jite ji hi ek din

sach ka ye talKHaba-e-shirin

har zi-ruh ko pina hoga

maut ka zaiqa chakhna hoga