ek maut ek ehtijaj

los angeles ke zartāb shabistānoñ meñ

so ga.ī aaj vo āvāz ki jis kā jaadū

bū-e-gul ban ke uḌā kūcha-ba-kūcha har sū

ban ke ik chīḳh laraz jaatī hai ab kānoñ meñ

shab-e-gesū shafaq-e-lab ruḳh-e-tābāñ kī sahar

kho ga.e aaj añdheroñ ke sanam-ḳhānoñ meñ

ḳhvāhish-e-marg meñ Duubī huī shādāb-nazar

bujh ga.ī dard ke haibat-zada aivānoñ meñ

zulf-e-zarrīñ kī mahak phuul se hoñToñ kī hañsī

nashsha-e-husn meñ bahkī huī alhaḌ raftār

chashm-e-gul-gūñ kī kiran dast-e-hinā.ī kī bahār

Dhal ga.ī raat shab-e-rafta kī rūdād banī

ab bhī kuchh kahne ko betāb haiñ vo hoñT jinheñ

mil sakā mahfil-e-hastī meñ na izn-e-guftār

ab bhī siine meñ taḌaptā hai vo qalb-e-mahzūñ

mil sakī jis ko na be-laus mohabbat kī bahār

bistar-e-marg pe sākit hai vo naqsh-e-mānī

jis kī pur-nūr javānī ko havas-kāroñ ne

ma.abad-e-fan ke ḳhudāoñ ne jahāñ-dāroñ ne

ek miTtī huī tahzīb ke sardāroñ ne

qarya qarya sar-e-bāzār kiyā thā nīlām

gardish-e-vaqt ke dāman pe rahegā ilzām

los angeles ke zartab shabistanon mein

so gai aaj wo aawaz ki jis ka jadu

bu-e-gul ban ke uDa kucha-ba-kucha har su

ban ke ek chiKH laraz jati hai ab kanon mein

shab-e-gesu shafaq-e-lab ruKH-e-taban ki sahar

kho gae aaj andheron ke sanam-KHanon mein

KHwahish-e-marg mein Dubi hui shadab-nazar

bujh gai dard ke haibat-zada aiwanon mein

zulf-e-zarrin ki mahak phul se honTon ki hansi

nashsha-e-husn mein bahki hui alhaD raftar

chashm-e-gul-gun ki kiran dast-e-hinai ki bahaar

Dhal gai raat shab-e-rafta ki rudad bani

ab bhi kuchh kahne ko betab hain wo honT jinhen

mil saka mahfil-e-hasti mein na izn-e-guftar

ab bhi sine mein taDapta hai wo qalb-e-mahzun

mil saki jis ko na be-laus mohabbat ki bahaar

bistar-e-marg pe sakit hai wo naqsh-e-mani

jis ki pur-nur jawani ko hawas-karon ne

mabad-e-fan ke KHudaon ne jahan-daron ne

ek miTti hui tahzib ke sardaron ne

qarya qarya sar-e-bazar kiya tha nilam

gardish-e-waqt ke daman pe rahega ilzam