ek nazar

sote sote jo yakāyak kabhī khul jaatī hai aañkh

nīm-bedārī meñ aatī hai nazar ek nazar

kahkashāñ se bhī ziyāda hai latāfat us meñ

āḳhir-e-shab ke mah-e-nīm-farozāñ kī tarah

ḳhvāb-āvar sī shuāoñ meñ hai lipTī lipTī

phir bhī is narm nigāhī meñ haiñ kyā tiir chhupe

tanz hai talḳhī-e-daurāñ kā ik afsāna hai

is meñ hasrat bhī shikāyat bhī ġham-e-furqat bhī

dil laraz jaatā hai aur hotī hai vahshat taarī

mujh ko mahsūs ye hotā hai ki mujrim maiñ huuñ

aisā lagtā hai ki toḌā hai kisī ke dil ko

dil jo ma.asūm thā be-laus thā pākīza thā

kyā karūñ kyā na karūñ koī mudāvā bhī nahīñ

kuchh samajh meñ nahīñ aatā ye muamma kyā hai

niiñd se uThte zarā Dar sā mujhe lagtā hai

nīm-bedārī meñ aatī hai nazar ek nazar

aah vo mīThī nazar talḳh nazar paak nazar

tīr-o-nashtar haiñ chhupe kitnī hai saffāk nazar

yaad kuchh bhī nahīñ aatā mujhe us ke aage

haañ kisī yug meñ kisī ne mirī puujā kī thī

maiñ ne us ko to magar ġhaur se dekhā bhī nahīñ

pyaar kī bheñT chaḌhāne kabhī aayā thā koī

maiñ ne muñh pher liyā devī thī maiñ patthar kī

lekin is baat ko kitne hī janam biit ga.e

phir bhī pīchhā mirā karne se na vo baaz aayā

yuuñ hī sadiyoñ se hai mere hī liye āvāra

nīm-bedārī meñ aatī hai nazar ek nazar

sote sote jo yakayak kabhi khul jati hai aankh

nim-bedari mein aati hai nazar ek nazar

kahkashan se bhi ziyaada hai latafat us mein

aaKHir-e-shab ke mah-e-nim-farozan ki tarah

KHwab-awar si shuaon mein hai lipTi lipTi

phir bhi is narm nigahi mein hain kya tir chhupe

tanz hai talKHi-e-dauran ka ek afsana hai

is mein hasrat bhi shikayat bhi gham-e-furqat bhi

dil laraz jata hai aur hoti hai wahshat tari

mujh ko mahsus ye hota hai ki mujrim main hun

aisa lagta hai ki toDa hai kisi ke dil ko

dil jo masum tha be-laus tha pakiza tha

kya karun kya na karun koi mudawa bhi nahin

kuchh samajh mein nahin aata ye muamma kya hai

nind se uThte zara Dar sa mujhe lagta hai

nim-bedari mein aati hai nazar ek nazar

aah wo miThi nazar talKH nazar pak nazar

tir-o-nashtar hain chhupe kitni hai saffak nazar

yaad kuchh bhi nahin aata mujhe us ke aage

han kisi yug mein kisi ne meri puja ki thi

main ne us ko to magar ghaur se dekha bhi nahin

pyar ki bhenT chaDhane kabhi aaya tha koi

main ne munh pher liya dewi thi main patthar ki

lekin is baat ko kitne hi janam bit gae

phir bhi pichha mera karne se na wo baz aaya

yun hi sadiyon se hai mere hi liye aawara

nim-bedari mein aati hai nazar ek nazar