ek nazm

udāsī ke piile daraḳhtoñ kī shāḳhoñ se chipke hue

sabz pattoñ meñ terā tajassus

mire jism kī TūTtī sarhadoñ par

ḳhayāloñ ke sāyoñ ko rusvā karegā

kueñ ke andhere kī bhīgī huī

jāmunī aañkh kī gol chiknā.ī ke

surḳh ḳhvāboñ ke andar

javāñ lams ke ek jañgalī kabūtar ke

phaile hue par ufuq ko chhuveñge

mujhe band kamre meñ baiThā huā dekh kar

gol khiḌkī ke shīshoñ pe

bārish ke qatroñ kī āñkheñ khuleñgī

koī marmarīñ haath ThanDī havā meñ

mujhe apnī jānib bulā.egā lekin

mujhe ḳhauf hai terā piilā tajassus

samundar pe phailī huī sūrajī shaam kī sīḌhiyoñ se

tujhe ḳhud-kushī kī taraf le na jaa.e

udasi ke pile daraKHton ki shaKHon se chipke hue

sabz patton mein tera tajassus

mere jism ki TuTti sarhadon par

KHayalon ke sayon ko ruswa karega

kuen ke andhere ki bhigi hui

jamuni aankh ki gol chiknai ke

surKH KHwabon ke andar

jawan lams ke ek jangali kabutar ke

phaile hue par ufuq ko chhuwenge

mujhe band kamre mein baiTha hua dekh kar

gol khiDki ke shishon pe

barish ke qatron ki aankhen khulengi

koi marmarin hath ThanDi hawa mein

mujhe apni jaanib bulaega lekin

mujhe KHauf hai tera pila tajassus

samundar pe phaili hui suraji sham ki siDhiyon se

tujhe KHud-kushi ki taraf le na jae