ek nazm

fazā meñ ik sukūn thā

har taraf sahme hue se zard chehre

pyaas ke maare zamīñ par gir rahe the

aur kuchh be-rahm daatā

bebasī kā ye tamāshā

dekh kar ḳhush ho rahe the

garm pyāsī ret par baiThe hue

saare kisī ke muntazir the

vaqt ke daatā sabhī

ḳhud-sāḳhta ḳholoñ meñ lipTe so rahe the

aur bāhar

pyaas kā sahrā musalsal muñh chiḌhātā thā

ki itne meñ

usī sahrā kī qismat khul ga.ī

phir

ek chashma phuuT kar

sahrā kī taptī ret par

bahne lagā ik dāstāñ kahne lagā

chhoTe baḌe patthar bikhar kar reza reza ho ga.e

saarī purānī gard pal meñ bah ga.ī

aur sirf paanī kī ravānī rah ga.ī

jo saare bhārī aur bosīda butoñ ko bhī

bahā kar le ga.ī

chāroñ taraf ik raushnī phailī

sabhī chehroñ ne sukh kā saañs paayā

aur ik ḳhush-kun safar ke ḳhvāb dekhe

aur phir

ik sāzishī lamha

badan par zulm kī sañgīñ qabā pahne

bahīmāna ra.ūnat sar pe rakkhe

apne bhārī bhārī būToñ meñ

hamārī umr bhar kī mehnatoñ aur ḳhvāhishoñ ke

us ujāle ko churā kar le gayā

jo saiñkaḌoñ tārīk lamhoñ ke

samundar se hameñ hāsil huā thā

faza mein ek sukun tha

har taraf sahme hue se zard chehre

pyas ke mare zamin par gir rahe the

aur kuchh be-rahm data

bebasi ka ye tamasha

dekh kar KHush ho rahe the

garm pyasi ret par baiThe hue

sare kisi ke muntazir the

waqt ke data sabhi

KHud-saKHta KHolon mein lipTe so rahe the

aur bahar

pyas ka sahra musalsal munh chiDhata tha

ki itne mein

usi sahra ki qismat khul gai

phir

ek chashma phuT kar

sahra ki tapti ret par

bahne laga ek dastan kahne laga

chhoTe baDe patthar bikhar kar reza reza ho gae

sari purani gard pal mein bah gai

aur sirf pani ki rawani rah gai

jo sare bhaari aur bosida buton ko bhi

baha kar le gai

chaaron taraf ek raushni phaili

sabhi chehron ne sukh ka sans paya

aur ek KHush-kun safar ke KHwab dekhe

aur phir

ek sazishi lamha

badan par zulm ki sangin qaba pahne

bahimana raunat sar pe rakkhe

apne bhaari bhaari buTon mein

hamari umr bhar ki mehnaton aur KHwahishon ke

us ujale ko chura kar le gaya

jo sainkaDon tarik lamhon ke

samundar se hamein hasil hua tha