ek nazm jangalon ke nam

zamīn sho.ale ugal rahī hai

fazā se tezāb gir rahā hai

zamīn agnī pe loTtī hai

havā.eñ chehra bigāḌtī haiñ

sunā to thā

aaj dekhte haiñ

yahāñ havā.eñ haiñ nār-sīrat

azal se le kar abad talak be-qarār hoñgī

hamārī rūheñ

janm janm tak

bhaTak bhaTak kar

fanā fanā be-karāñ tabāhī kā naam le kar

na peḌ hoñge

na qumriyoñ ke surīle naġhme

shivālikā par na koī jogī

sadā-e-jashn-e-bahār degā

koī qalandar na koī ruumī

na.e suroñ kī talāsh karne

kisī niystāñ meñ jā rukegā

zamin shoale ugal rahi hai

faza se tezab gir raha hai

zamin agni pe loTti hai

hawaen chehra bigaDti hain

suna to tha

aaj dekhte hain

yahan hawaen hain nar-sirat

azal se le kar abad talak be-qarar hongi

hamari ruhen

janm janm tak

bhaTak bhaTak kar

fana fana be-karan tabahi ka nam le kar

na peD honge

na qumriyon ke surile naghme

shiwalika par na koi jogi

sada-e-jashn-e-bahaar dega

koi qalandar na koi rumi

nae suron ki talash karne

kisi niystan mein ja rukega