ek nazm zamin walon ke nam

havā

kuchh aisī chalī

ki ḳheme ukhaḌ ga.e haiñ

ġhubār aisā ġhubār uThā

ki dhuul āñkhoñ meñ jam ga.ī hai

charāġh bhaḌkeñ

to is meñ un kā qusūr kyā hai

shumāl kī

ye havā

kuchh aisī sharīr-o-gustāḳh hai

jo baḌh kar

bhaḌaknā un ko sikhā rahī hai

jalā rahī hai

bujhā rahī hai

havā kuchh aisī chalī ki ḳheme ukhaḌ ga.e haiñ

charāġh donoñ taraf ke

itne bujhe ki manzar bhī ro rahā hai

siyah libādoñ siyah naqāboñ kā raaj har-sū

kahāñ ke rishte

kahāñ ke naate

kahāñ ke rishte

kahāñ kī manzil

chahār samtoñ meñ aag aisī lagī huī hai

bujhānā chāheñ to baḌh rahī hai

badan-darīda kafan-darīda paḌī haiñ lāsheñ

saroñ meñ āñchal

badan se zevar

utar chuke haiñ

jo ḳhvāb dekhe the ham ne

vo ḳhvāb

mar chuke haiñ

havā kuchh aisī chalī

ki ḳheme ukhaḌ ga.e haiñ

hamāre ghar meñ

tamām chehre the raushnī ke

tamām chehroñ se raushnī thī

vo ġhair the

ye sunā thā maiñ ne

magar maiñ jin par

duā.eñ paḌh paḌh ke phūñktā thā

vo merā ghar phūñkne ko aa.e

bas ek dīvār biich meñ thī

vahī paḌosī bhī aa.e

ḳhanjar-ba-dast aa.e

ye kaisī āñdhī chalī ki chehre bigaḌ ga.e haiñ

havā kuchh aisī chalī ki ḳheme ukhaḌ ga.e haiñ

na koī aḳhbār hai jo kīchaḌ meñ

phuul jaisā khilā huā hai

na radio meñ ḳhabar kī ḳhushbū

na dūrdarshan meñ hai vo manzar

jo mujh ko

sūraj dikhā rahā hai

ajiib mausam hai

shahr-e-dil meñ

na aañkh apnī

na kaan apne

na paañv apne

pata nahīñ ham

ye kis kī āñkhoñ se dekhte haiñ

ye kis ke kānoñ se sun rahe haiñ

ye kis ke pairoñ se chal rahe haiñ

ajiib mausam hai

shahr-e-dil meñ

zamīn vaale

to aaj dekho

ḳhalā meñ gardish lagā rahe haiñ

samundaroñ par

makān apne banā rahe haiñ

isī zamīñ par

rishī munī aur nabī bhī aa.e

tamām samtoñ ke vāste

ik payām laa.e

magar maiñ itnā hī jāntā huuñ

zamīn par zulm ho rahā hai

zamīn vaale hī kar rahe haiñ

vahāñ farishtoñ ne sach kahā thā

magar ḳhudā jāntā thā sab kuchh

vo aaj bhī jāntā hai sab kuchh

vo āsmāñ se

utar ke

apnī zamīñ par aa.egā

bhuul jaao

vo apne hāthoñ se

is zamīñ ko

hasīñ banā.egā

bhuul jaao

charāġh andar charāġh tum ho

kitāb andar kitāb tum ho

savāl andar savāl tum ho

javāb andar javāb tum ho

ḳhudā ne roz-e-azal

jo dekhā thā ḳhvāb tum ho

tumhīñ se izzat

tumhīñ se nik.hat

tumhīñ se shohrat

zamīn kī hai

bachā sako to

ise bachā lo

zamīn vaalo

zamīn vaalo

hawa

kuchh aisi chali

ki KHeme ukhaD gae hain

ghubar aisa ghubar uTha

ki dhul aankhon mein jam gai hai

charagh bhaDken

to is mein un ka qusur kya hai

shumal ki

ye hawa

kuchh aisi sharir-o-gustaKH hai

jo baDh kar

bhaDakna un ko sikha rahi hai

jala rahi hai

bujha rahi hai

hawa kuchh aisi chali ki KHeme ukhaD gae hain

charagh donon taraf ke

itne bujhe ki manzar bhi ro raha hai

siyah libaadon siyah naqabon ka raj har-su

kahan ke rishte

kahan ke nate

kahan ke rishte

kahan ki manzil

chahaar samton mein aag aisi lagi hui hai

bujhana chahen to baDh rahi hai

badan-darida kafan-darida paDi hain lashen

saron mein aanchal

badan se zewar

utar chuke hain

jo KHwab dekhe the hum ne

wo KHwab

mar chuke hain

hawa kuchh aisi chali

ki KHeme ukhaD gae hain

hamare ghar mein

tamam chehre the raushni ke

tamam chehron se raushni thi

wo ghair the

ye suna tha main ne

magar main jin par

duaen paDh paDh ke phunkta tha

wo mera ghar phunkne ko aae

bas ek diwar bich mein thi

wahi paDosi bhi aae

KHanjar-ba-dast aae

ye kaisi aandhi chali ki chehre bigaD gae hain

hawa kuchh aisi chali ki KHeme ukhaD gae hain

na koi aKHbar hai jo kichaD mein

phul jaisa khila hua hai

na radio mein KHabar ki KHushbu

na durdarshan mein hai wo manzar

jo mujh ko

suraj dikha raha hai

ajib mausam hai

shahr-e-dil mein

na aankh apni

na kan apne

na panw apne

pata nahin hum

ye kis ki aankhon se dekhte hain

ye kis ke kanon se sun rahe hain

ye kis ke pairon se chal rahe hain

ajib mausam hai

shahr-e-dil mein

zamin wale

to aaj dekho

KHala mein gardish laga rahe hain

samundaron par

makan apne bana rahe hain

isi zamin par

rishi muni aur nabi bhi aae

tamam samton ke waste

ek payam lae

magar main itna hi jaanta hun

zamin par zulm ho raha hai

zamin wale hi kar rahe hain

wahan farishton ne sach kaha tha

magar KHuda jaanta tha sab kuchh

wo aaj bhi jaanta hai sab kuchh

wo aasman se

utar ke

apni zamin par aaega

bhul jao

wo apne hathon se

is zamin ko

hasin banaega

bhul jao

charagh andar charagh tum ho

kitab andar kitab tum ho

sawal andar sawal tum ho

jawab andar jawab tum ho

KHuda ne roz-e-azal

jo dekha tha KHwab tum ho

tumhin se izzat

tumhin se nikhat

tumhin se shohrat

zamin ki hai

bacha sako to

ise bacha lo

zamin walo

zamin walo