ek qissa-e-kohna ki tajdid

nigāh-e-fusūñ-sāz

dil meñ utar kar

zamāne se begāna sā kar ga.ī

lahū qatra qatra

nigāhoñ se zanjīr ban kar Tapaktā rahegā

ye tūfānī maujeñ

yūñhī kab talak mujh se

aa aa ke Takrā.eñgī

aag kab tak jalegī

dhuāñ kab talak yūñhī uThtā rahegā

ye kaise huā

saare rishte faqat ek hī zaat meñ aa samā.e

hameñ naaz hai

ki ham ne vo sadiyoñ purānī kahānī dobāra kahī hai

ki ik qissa-e-kuhna ko phir se dohrāyā ham ne

vo sadiyoñ purānī kahānī

jise aaj kī dauḌtī bhāgtī

zindagī ne farāmosh sā kar diyā thā

nigah-e-fusun-saz

dil mein utar kar

zamane se begana sa kar gai

lahu qatra qatra

nigahon se zanjir ban kar Tapakta rahega

ye tufani maujen

yunhi kab talak mujh se

aa aa ke Takraengi

aag kab tak jalegi

dhuan kab talak yunhi uThta rahega

ye kaise hua

sare rishte faqat ek hi zat mein aa samae

hamein naz hai

ki hum ne wo sadiyon purani kahani dobara kahi hai

ki ek qissa-e-kuhna ko phir se dohraya hum ne

wo sadiyon purani kahani

jise aaj ki dauDti bhagti

zindagi ne faramosh sa kar diya tha