ek sham

dopahar se jaane kyoñ

muzmahil thā dil merā

thī ajab sī bechainī

shaam jab qarīb aa.ī

gaañv se nikal kar maiñ

duur tak chalā aaya

aur ik shajar ke paas

baiTh ke ba-ḳhāmoshī

gum thā maiñ ḳhayāloñ meñ

daf.atan ik aahaT sī

is tarah huī mahsūs

jaise koī tezī se

paas hī se guzrā ho

aur jab nazar uTThī

ek ajiib manzar thā

sāmne shikasta sā

ik mazār thā jis par

ik hasīna aa.ī thī

us hasīna kā chehra

chāñd se mushābah thā

us kī zulf-e-pur-ḳham meñ

husn thā ghaTāoñ kā

dekhtā huuñ bil-āḳhir

vo hasīna marqad par

ik diyā jalātī hai

jis ke nuur meñ us kā

chehra tamtamātā hai

gaahe muskurātī hai

soch ke na jaane kyā

lājvantī kī mānind

ḳhud hī jheñp jaatī hai

gaahe muzmahil ho kar

āsmāñ ko taktī hai

ashk bahne lagte haiñ

sham.a kaañp jaatī hai

āsmāñ kī jānib phir

us ke haath uThte haiñ

jaane mudda.ā kyā hai

jaane kyā tamanna hai

dopahar se jaane kyon

muzmahil tha dil mera

thi ajab si bechaini

sham jab qarib aai

ganw se nikal kar main

dur tak chala aaya

aur ek shajar ke pas

baiTh ke ba-KHamoshi

gum tha main KHayalon mein

dafatan ek aahaT si

is tarah hui mahsus

jaise koi tezi se

pas hi se guzra ho

aur jab nazar uTThi

ek ajib manzar tha

samne shikasta sa

ek mazar tha jis par

ek hasina aai thi

us hasina ka chehra

chand se mushabah tha

us ki zulf-e-pur-KHam mein

husn tha ghaTaon ka

dekhta hun bil-aKHir

wo hasina marqad par

ek diya jalati hai

jis ke nur mein us ka

chehra tamtamata hai

gahe muskuraati hai

soch ke na jaane kya

lajwanti ki manind

KHud hi jhenp jati hai

gahe muzmahil ho kar

aasman ko takti hai

ashk bahne lagte hain

shama kanp jati hai

aasman ki jaanib phir

us ke hath uThte hain

jaane muddaa kya hai

jaane kya tamanna hai