ek subh

sañvar rahe the havā ke latīf jhoñke

ubhar rahe the guloñ se bahār ke naqshe

nikhar rahe the basārat-navāz nazzāre

bikhar rahe the samā.at pe kaif-zā naġhme

sudhar rahe the bigaḌ kar hayāt ke lamhe

sanak rahī thī masarrat meñ Duub kar purvā

chaTak rahā thā ba-andāz-e-ḳhās har ġhuncha

mahak rahī thī magar chāñdnī bharī duniyā

lahak rahā thā surūr-o-nashāt meñ sabza

jhalak rahā thā havāoñ meñ rang maujoñ kā

guzar rahī thī ru-pahlī trāvatoñ se nazar

biphar rahī thiiñ ġhinā.ī harārateñ aksar

ThiThur rahā thā shahābī tabassumoñ kā asar

utar rahā thā fizā.ī jumūd aalam par

Thahar rahā thā jamālī haqīqatoñ kā jigar

badal rahī thī fazā-e-ḳhamosh nauiyyat

ubal rahā thā ba-har-gām chashma-e-farhat

machal rahī thī diloñ meñ ḳhulūs kī nuz.hat

nikal rahī thī had-e-lutf-e-naum se fitrat

bahal rahī thī suhāne samoñ se mahviyyat

basā chukī thī dimāġhoñ ko raat kī raanī

uḌā rahe the dhuñdalke alaap koyal kī

luTā rahā thā tajallī sitāra-e-saharī

'sahar' ne baa'd adā-e-niyāz-e-ma.abūdī

'alalḳhusūs ba-sad ijz ye duā māñgī

sukūñ rahe ki zamāne ko inqalāb rahe

har ek sa.ī meñ 'najma' tū kāmyāb rahe

sanwar rahe the hawa ke latif jhonke

ubhar rahe the gulon se bahaar ke naqshe

nikhar rahe the basarat-nawaz nazzare

bikhar rahe the samaat pe kaif-za naghme

sudhar rahe the bigaD kar hayat ke lamhe

sanak rahi thi masarrat mein Dub kar purwa

chaTak raha tha ba-andaz-e-KHas har ghuncha

mahak rahi thi magar chandni bhari duniya

lahak raha tha surur-o-nashat mein sabza

jhalak raha tha hawaon mein rang maujon ka

guzar rahi thi ru-pahli trawaton se nazar

biphar rahi thin ghinai hararaten aksar

ThiThur raha tha shahabi tabassumon ka asar

utar raha tha fizai jumud aalam par

Thahar raha tha jamali haqiqaton ka jigar

badal rahi thi faza-e-KHamosh nauiyyat

ubal raha tha ba-har-gam chashma-e-farhat

machal rahi thi dilon mein KHulus ki nuzhat

nikal rahi thi had-e-lutf-e-naum se fitrat

bahal rahi thi suhane samon se mahwiyyat

basa chuki thi dimaghon ko raat ki rani

uDa rahe the dhundalke alap koyal ki

luTa raha tha tajalli sitara-e-sahari

'sahar' ne ba'd ada-e-niyaz-e-mabudi

'alalKHusus ba-sad ijz ye dua mangi

sukun rahe ki zamane ko inqalab rahe

har ek sai mein 'najma' tu kaamyab rahe