faqa-masti aur zawal-e-sharafat

qaht us par qatl-o-ġhārat kā ye aalam haa.e haa.e

har taraf hai nāla-o-fariyād-o-mātam haa.e haa.e

ik taraf kapḌe kā mātam ik taraf ġhalle kī maar

ab to hai is zindagī se naak meñ dam haa.e haa.e

jin ke dastarḳhvān par hotī thiiñ sad.hā ne.amateñ

un ko miltī hai ġhizā-e-ranj paiham haa.e haa.e

shabnam-o-kamḳhāb kī jo taab lā sakte na the

un ko khaddar bhī nahīñ hotā farāham haa.e haa.e

aaj hai likkhe-paḌhoñ ke ghar meñ faaqa aa.e din

har-kasāñ is vaqt hai fir.aun-e-āzam haa.e haa.e

miT rahā hai fāqa-mastī se sharāfat kā nishāñ

bachcha bachcha mulk kā hai paikar-e-ġham haa.e haa.e

kāġhazī sikkoñ ne chhīnā ashrafiyyoñ kā faroġh

hai rizālat meñ sharāfat aaj mudġham haa.e haa.e

vā.e-nākāmī vo nāsūr-e-jigar sābit huā

jānte the jis ko zaḳhm-e-dil kā marham haa.e haa.e

fāqa-mastān-e-vatan is raaz se vāqif na the

īd-e-āzādī manā.egī moharram haa.e haa.e

jab umīdeñ uTh ga.iiñ saarā gila jaatā rahā

zindagī se zindagī kā hausla jaatā rahā

qaht us par qatl-o-ghaarat ka ye aalam hae hae

har taraf hai nala-o-fariyaad-o-matam hae hae

ek taraf kapDe ka matam ek taraf ghalle ki mar

ab to hai is zindagi se nak mein dam hae hae

jin ke dastarKHwan par hoti thin sadha neamaten

un ko milti hai ghiza-e-ranj paiham hae hae

shabnam-o-kamKHab ki jo tab la sakte na the

un ko khaddar bhi nahin hota faraham hae hae

aaj hai likkhe-paDhon ke ghar mein faqa aae din

har-kasan is waqt hai firaun-e-azam hae hae

miT raha hai faqa-masti se sharafat ka nishan

bachcha bachcha mulk ka hai paikar-e-gham hae hae

kaghazi sikkon ne chhina ashrafiyyon ka farogh

hai rizalat mein sharafat aaj mudgham hae hae

wae-nakaami wo nasur-e-jigar sabit hua

jaante the jis ko zaKHm-e-dil ka marham hae hae

faqa-mastan-e-watan is raaz se waqif na the

id-e-azadi manaegi moharram hae hae

jab umiden uTh gain sara gila jata raha

zindagi se zindagi ka hausla jata raha