fankar aur maut

jab mujhe ye ḳhayāl aatā hai

ek fankār mar nahīñ saktā

us kī taḳhlīq zinda rahtī hai

us kā kirdār mar nahīñ saktā

yaad aate haiñ mujh ko vo fankār

zindagī-bhar jo zahar pī ke jiye

ġham kī tasvīr ban ke zinda rahe

dahr-e-fānī meñ apne fan ke liye

aur is dahr ke nikammoñ ne

un kī rāhoñ meñ ḳhaar bikhrā.e

jab ye dasht-e-junūñ meñ aur baḌhe

un ke dāman ke taar uljhā.e

laakh rokā unheñ zamāne ne

chal diye jis taraf chalte rahe

chand rāheñ nikāl kar apnī

jāvedāñ apnā naam karte rahe

aaj duniyā ke is añdhere meñ

jal rahe haiñ vahī charāġh jinheñ

āñdhiyoñ ne jalāyā thā ik rose

zindagī kī hasīn rāhoñ meñ

ek fankār hai charāġh vahī

jis ko koī bujhā nahīñ saktā

jāgtī jagmagātī rāhoñ se

koī jis ko haTā nahīñ saktā

ban ke fankār sochtā huuñ maiñ

apnī hastī ko jāvedāñ kar luuñ

raaz apnā batā ke duniyā ko

saarī duniyā ko rāzdāñ kar luuñ

maut aa.e to us se hañs ke kahūñ

maiñ huuñ fankār mar nahīñ saktā

merī taḳhlīq zinda rahtī hai

merā kirdār mar nahīñ saktā

jab mujhe ye KHayal aata hai

ek fankar mar nahin sakta

us ki taKHliq zinda rahti hai

us ka kirdar mar nahin sakta

yaad aate hain mujh ko wo fankar

zindagi-bhar jo zahar pi ke jiye

gham ki taswir ban ke zinda rahe

dahr-e-fani mein apne fan ke liye

aur is dahr ke nikammon ne

un ki rahon mein KHar bikhrae

jab ye dasht-e-junun mein aur baDhe

un ke daman ke tar uljhae

lakh roka unhen zamane ne

chal diye jis taraf chalte rahe

chand rahen nikal kar apni

jawedan apna nam karte rahe

aaj duniya ke is andhere mein

jal rahe hain wahi charagh jinhen

aandhiyon ne jalaya tha ek rose

zindagi ki hasin rahon mein

ek fankar hai charagh wahi

jis ko koi bujha nahin sakta

jagti jagmagati rahon se

koi jis ko haTa nahin sakta

ban ke fankar sochta hun main

apni hasti ko jawedan kar lun

raaz apna bata ke duniya ko

sari duniya ko raazdan kar lun

maut aae to us se hans ke kahun

main hun fankar mar nahin sakta

meri taKHliq zinda rahti hai

mera kirdar mar nahin sakta