fankar

maiñ huuñ fankār mujhe maut na aa.egī kabhī

jism miTtā hai to miTne do koī ġham na karo

maiñ har ik zehn har ik dil meñ basā jaatā huuñ

tum mire vāste in āñkhoñ ko pur-nam na karo

ruuh to vaqt kī pāband hai jaane do ise

jism miTTī kā hai miTTī meñ milā do yaaro

mere afkār kitāboñ meñ raheñge zinda

mere ehsās ko zehnoñ meñ jagah do yaaro

jab bhī chāhoge jahāñ chāhoge pāoge mujhe

maiñ nahīñ harf-e-ġhalat huuñ ki miTāyā jā.ūñ

raqs karte haiñ har ik zehn meñ mere afkār

ye to mumkin hī nahīñ hai ki bhulāyā jā.ūñ

gūñjtī hai jo ḳhalāoñ meñ vo jhankār huuñ maiñ

ḳhuub pahchān lo fankār huuñ fankār huuñ maiñ

main hun fankar mujhe maut na aaegi kabhi

jism miTta hai to miTne do koi gham na karo

main har ek zehn har ek dil mein basa jata hun

tum mere waste in aankhon ko pur-nam na karo

ruh to waqt ki paband hai jaane do ise

jism miTTi ka hai miTTi mein mila do yaro

mere afkar kitabon mein rahenge zinda

mere ehsas ko zehnon mein jagah do yaro

jab bhi chahoge jahan chahoge paoge mujhe

main nahin harf-e-ghalat hun ki miTaya jaun

raqs karte hain har ek zehn mein mere afkar

ye to mumkin hi nahin hai ki bhulaya jaun

gunjti hai jo KHalaon mein wo jhankar hun main

KHub pahchan lo fankar hun fankar hun main