faqat hisse ki KHatir

faqat hisse kī ḳhātir

kaT ga.ī ye zindagī mīlād sunñe meñ

bilā jaane ki hissa hai to kaisā aur kitnā

ye sab āsāñ nahīñ thā

gulāb aur itr se bhārī fazā meñ saañs lenā

der tak āsāñ nahīñ thā

na āsāñ thā samajhne kī adākārī bhī karnā

us zabāñ ko

jis se maiñ nā-āshnā thā aur vo bhī bā-adab rah kar

bahut bhārī thā bele kā vo gajrā

jo pahnāyā gayā thā mujh ko aglī saf meñ baiThāne se pahle

haañ sazā jaisā thā merā baiThnā us saf meñ

jis meñ ek bhī bachcha nahīñ thā

aur jahāñ se duur thiiñ sab chilmaneñ

aur un se chhantī raunaqeñ

ye sab qurbāniyāñ de kar agar hisse kī ḳhvāhish hai mujhe to kyā ġhalat hai

mire hisse kī ḳhvāhish par hañso mat

mirā hissa to pakkā hai agar maiñ so bhī jā.ūñ

ḳhudā ko sab patā hai

faqat hisse ki KHatir

kaT gai ye zindagi milad sunne mein

bila jaane ki hissa hai to kaisa aur kitna

ye sab aasan nahin tha

gulab aur itr se bhaari faza mein sans lena

der tak aasan nahin tha

na aasan tha samajhne ki adakari bhi karna

us zaban ko

jis se main na-ashna tha aur wo bhi ba-adab rah kar

bahut bhaari tha bele ka wo gajra

jo pahnaya gaya tha mujh ko agli saf mein baiThane se pahle

han saza jaisa tha mera baiThna us saf mein

jis mein ek bhi bachcha nahin tha

aur jahan se dur thin sab chilmanen

aur un se chhanti raunaqen

ye sab qurbaniyan de kar agar hisse ki KHwahish hai mujhe to kya ghalat hai

mere hisse ki KHwahish par hanso mat

mera hissa to pakka hai agar main so bhi jaun

KHuda ko sab pata hai