fareb

chhīn kar mujh se mirī jaan mire dil kā qarār

tū ne gul kar hī diye merī umīdoñ ke charāġh

tū ne kyoñ ghol diyā zahr mirī rag rag meñ

tū ne kyoñ toḌ diye merī mohabbat ke ayāġh

mujh ko ma.alūm thā qātil hai tū armānoñ kī

dil-e-majrūh ke armānoñ se tū khelegī

dil nahīñ hai tire siine meñ koī patthar hai

dil se uThte hue tūfānoñ se tū khelegī

tū ne kyā ḳhuub diyā mujh ko mohabbat kā sila

umr bhar maiñ nahīñ bhūlūñgā mohabbat terī

apne is chāhne vaale ko diyā tū ne fareb

jis ne kī thī sahar-o-shām ibādat terī

ranj-o-ġham mujh ko atā kar ke zamāne bhar ke

merī rangīn bahāroñ ko ujāḌā tū ne

bevafā.ī tirī fitrat hai huā ab ma.alūm

tiir furqat kā mire siine meñ gaaḌā tū ne

chhin kar mujh se meri jaan mere dil ka qarar

tu ne gul kar hi diye meri umidon ke charagh

tu ne kyon ghol diya zahr meri rag rag mein

tu ne kyon toD diye meri mohabbat ke ayagh

mujh ko malum tha qatil hai tu armanon ki

dil-e-majruh ke armanon se tu khelegi

dil nahin hai tere sine mein koi patthar hai

dil se uThte hue tufanon se tu khelegi

tu ne kya KHub diya mujh ko mohabbat ka sila

umr bhar main nahin bhulunga mohabbat teri

apne is chahne wale ko diya tu ne fareb

jis ne ki thi sahar-o-sham ibaadat teri

ranj-o-gham mujh ko ata kar ke zamane bhar ke

meri rangin bahaaron ko ujaDa tu ne

bewafai teri fitrat hai hua ab malum

tir furqat ka mere sine mein gaDa tu ne