fareb-kar shahr

fareb hī fareb kā ye shahr hai

ye shahr makr ke hasīn jāma-e-darāz meñ

taraqqiyoñ kī aaḌ meñ

fareb de rahā hai lamha lamha rāhgīr ko

ye shahr bhī ajiib hai

yahāñ ḳhulūs-o-pyār amn dostī fareb haiñ

fareb-e-guftugū kā naam hī hai fard kā amal

fareb-e-rang-o-bū meñ kho ke rah gayā hai aadmī

ye raunaqeñ ye bām-o-dar fareb hī fareb haiñ

ye shahr bhī ajiib hai

har ek jurm raast hai

har ek raast jurm hai

yahāñ hai nāravā ravā

yahāñ koī sazā nahīñ

ye shahr bhī ajiib hai

hujūm-e-gumrahī meñ ghuT rahī hai rūh-e-zindagī

fareb de rahī hai shakl-e-dostī meñ dushmanī

sadāqatoñ ko sāmnā hai har qadam zavāl kā

fareb-kār shahr ke fareb hī ajiib haiñ

ye shahr bhī ajiib hai

fareb hi fareb ka ye shahr hai

ye shahr makr ke hasin jama-e-daraaz mein

taraqqiyon ki aaD mein

fareb de raha hai lamha lamha rahgir ko

ye shahr bhi ajib hai

yahan KHulus-o-pyar amn dosti fareb hain

fareb-e-guftugu ka nam hi hai fard ka amal

fareb-e-rang-o-bu mein kho ke rah gaya hai aadmi

ye raunaqen ye baam-o-dar fareb hi fareb hain

ye shahr bhi ajib hai

har ek jurm rast hai

har ek rast jurm hai

yahan hai narawa rawa

yahan koi saza nahin

ye shahr bhi ajib hai

hujum-e-gumrahi mein ghuT rahi hai ruh-e-zindagi

fareb de rahi hai shakl-e-dosti mein dushmani

sadaqaton ko samna hai har qadam zawal ka

fareb-kar shahr ke fareb hi ajib hain

ye shahr bhi ajib hai