farishta koi na mujhe rok sake

terā chehra jhiil meñ khiltā huā kañval ho jaise

chāñd paanī meñ utar aayā ho jaise

sukūt nadī meñ chhāyā huā

ret chāñdī sī chamaktī huī

sargoshiyāñ chāñdnī meñ koī kartā huā

āhista āhista lab-o-ruḳhsār ko

chūmne kī koshish kartā huā

qānūn-e-fitrat se jaise ijāzat letā huā

jhiil kī āġhosh meñ

jism ko apne Dubotā huā

phir ek Dar sā taarī huā

haa.e ye sulagte hue jazbāt

betāb kiye dete haiñ

phir bhī dāman-e-sabr thāme hue

hai ik fitna mere qarīb

ḳhauf hai mujhe

farishta koī dekh rahā hai mujhe

kyūñki bahak jaane par

farishta-sifat hone kā

da.avā maiñ kar nahīñ saktā

mere mahbūb se kah do

jhiil ke kināre na mile

is ālam-e-be-ḳhudī meñ

ḳhud ko maiñ rok nahīñ saktā

kaash is tarah vo mujhe mil jaa.e

farishta koī na mujhe rok sake

tera chehra jhil mein khilta hua kanwal ho jaise

chand pani mein utar aaya ho jaise

sukut nadi mein chhaya hua

ret chandi si chamakti hui

sargoshiyan chandni mein koi karta hua

aahista aahista lab-o-ruKHsar ko

chumne ki koshish karta hua

qanun-e-fitrat se jaise ijazat leta hua

jhil ki aaghosh mein

jism ko apne Dubota hua

phir ek Dar sa tari hua

hae ye sulagte hue jazbaat

betab kiye dete hain

phir bhi daman-e-sabr thame hue

hai ek fitna mere qarib

KHauf hai mujhe

farishta koi dekh raha hai mujhe

kyunki bahak jaane par

farishta-sifat hone ka

dawa main kar nahin sakta

mere mahbub se kah do

jhil ke kinare na mile

is aalam-e-be-KHudi mein

KHud ko main rok nahin sakta

kash is tarah wo mujhe mil jae

farishta koi na mujhe rok sake