fasil-e-shab

ye dekhnā hai fasīl-e-shab kā hisār kab tak rahegā qaa.em

ye dekhnā hai fasīl-e-shab meñ panāh tum ko milegī kab tak

ye dekhnā hai rahegī kab tak ye jaur-e-paiham kī bālā-dastī

ye dekhnā hai ki zulm kī teġh ḳhūñ-fishānī karegī kab tak

sitam kī mī'ād aur kitnī tavīl hogī

sub.h kī mī'ād aur kitnī tavīl hogī

sajeñgī nau-e-bashar ke pākīza ḳhuuñ se kab tak ye qatl-gāheñ

lahū ye kab tak yūñhī bahegā

magar

ye shab jo ki muḳhtasar hai

yaqīn rakkho ki ye shab-e-zulm muḳhtasar hai

ki zulm ko hai zavāl āḳhir

tilism is kā hai TūTne ko

hisār-e-shab hai bikharne vaalā

liye hue mash'aleñ farozāñ

sahar ke ḳhuddām aa rahe haiñ

sahar kā paiġhām lā rahe haiñ

fasīl-e-shab ke qadam haiñ larzāñ

hisār-e-zulm-o-sitam kā maġhrūr sar hai Thokar meñ ġham-zadoñ ke

shab-e-siyah muñh chhupā rahī hai

sahar kā sūraj nikal rahā hai

ye dekhna hai fasil-e-shab ka hisar kab tak rahega qaem

ye dekhna hai fasil-e-shab mein panah tum ko milegi kab tak

ye dekhna hai rahegi kab tak ye jaur-e-paiham ki baala-dasti

ye dekhna hai ki zulm ki tegh KHun-fishani karegi kab tak

sitam ki mi'ad aur kitni tawil hogi

subh ki mi'ad aur kitni tawil hogi

sajengi nau-e-bashar ke pakiza KHun se kab tak ye qatl-gahen

lahu ye kab tak yunhi bahega

magar

ye shab jo ki muKHtasar hai

yaqin rakkho ki ye shab-e-zulm muKHtasar hai

ki zulm ko hai zawal aaKHir

tilism is ka hai TuTne ko

hisar-e-shab hai bikharne wala

liye hue mash'alen farozan

sahar ke KHuddam aa rahe hain

sahar ka paigham la rahe hain

fasil-e-shab ke qadam hain larzan

hisar-e-zulm-o-sitam ka maghrur sar hai Thokar mein gham-zadon ke

shab-e-siyah munh chhupa rahi hai

sahar ka suraj nikal raha hai