fasilen

ye merī chār-dīvārī

riyāsat hai mirī jis kī

maiñ ḳhud-muḳhtār malika huuñ

riyāsat kī hifāzat ke liye

atrāf dīvāreñ bhī uThtī haiñ

fasīleñ bhī to bantī haiñ

usī ke saath hī

ik aur sarhad bhī to hotī hai

nazariye kī

nazariye kī ye sarhad bhī hamārī hai

tahaffuz ke liye apne

kisī bhī andarūñ bairūn ḳhatroñ se

ye chādar chār-dīvārī zarūrī hai

to kyā is had meñ jo rahte haiñ

vo sab qaid hote haiñ

tumheñ bhī qaid lagtī huuñ

suno jaise hamāre mulk ke faujī

baqā-e-mulk kī ḳhātir hamārī sarhadoñ par

din raat pahre hote haiñ

isī tarah mirī chādar

hifāzat merī kartī hai

ye chādar chār-dīvārī

riyāsat hai mirī jis meñ

koī qaidī nahīñ huuñ maiñ

yahāñ rahte hue

be-fikr rahtī huuñ

bahut hī shaad rahtī huuñ

fasīleñ hī fasīleñ haiñ

magar āzād rahtī huuñ

ye meri chaar-diwari

riyasat hai meri jis ki

main KHud-muKHtar malika hun

riyasat ki hifazat ke liye

atraf diwaren bhi uThti hain

fasilen bhi to banti hain

usi ke sath hi

ek aur sarhad bhi to hoti hai

nazariye ki

nazariye ki ye sarhad bhi hamari hai

tahaffuz ke liye apne

kisi bhi andarun bairun KHatron se

ye chadar chaar-diwari zaruri hai

to kya is had mein jo rahte hain

wo sab qaid hote hain

tumhein bhi qaid lagti hun

suno jaise hamare mulk ke fauji

baqa-e-mulk ki KHatir hamari sarhadon par

din raat pahre hote hain

isi tarah meri chadar

hifazat meri karti hai

ye chadar chaar-diwari

riyasat hai meri jis mein

koi qaidi nahin hun main

yahan rahte hue

be-fikr rahti hun

bahut hi shad rahti hun

fasilen hi fasilen hain

magar aazad rahti hun