fikr-dar-fikr

ḳhushnumā ek phal shāḳh-e-ummīd kā

markaz-e-ārzū mehvar-e-justujū ḳhema-e-rang-o-bū

har nafas har nazar ruuh kī aabrū

jism kī dastaras se bahut duur thā

aañkh us ke ujāle sajātī rahī

paas se duur tak us ke qadmoñ kī āvāz aatī rahī

us ko paane kā har ik jatan

zindagī kī lagan

roz-o-shab kasmasātī rahī

kāvisheñ dā.ere sī banātī rahīñ

koshisheñ kitne ḳhāke sajātī rahīñ

aur phir ik ajab sāneha vaqt ne likh diyā

āñdhiyoñ ne use toḌ kar merī āġhosh meñ rakh diyā

koshisheñ kāvisheñ dam-ba-ḳhud

aur ab vus.at-e-ārzū apne dāman kī tangī pe hairān hai

ḳhvāhish-e-rā.egāñ muntashir

kaun se ghar meñ āḳhir basā.ūñ use

zindagī kis tarah se banā.ūñ use

apne siine se kaise lagā.ūñ use

duur kā ḳhvāb jab paas aaya mire

mas.ala ban gayā

ab pata ye chalā

sochne aur karne meñ kyā farq hai

KHushnuma ek phal shaKH-e-ummid ka

markaz-e-arzu mehwar-e-justuju KHema-e-rang-o-bu

har nafas har nazar ruh ki aabru

jism ki dastaras se bahut dur tha

aankh us ke ujale sajati rahi

pas se dur tak us ke qadmon ki aawaz aati rahi

us ko pane ka har ek jatan

zindagi ki lagan

roz-o-shab kasmasati rahi

kawishen daere si banati rahin

koshishen kitne KHake sajati rahin

aur phir ek ajab saneha waqt ne likh diya

aandhiyon ne use toD kar meri aaghosh mein rakh diya

koshishen kawishen dam-ba-KHud

aur ab wusat-e-arzu apne daman ki tangi pe hairan hai

KHwahish-e-raegan muntashir

kaun se ghar mein aaKHir basaun use

zindagi kis tarah se banaun use

apne sine se kaise lagaun use

dur ka KHwab jab pas aaya mere

masala ban gaya

ab pata ye chala

sochne aur karne mein kya farq hai