ghaalib

ik sadī baad khulā ham pe tafakkur terā

aañkh pechīda ḳhayāloñ kī tahoñ tak pahuñchī

tere jazbāt kī ātish ne lahū garmāyā

fahm-o-idrāk shanāvar bane gahre-pan ke

ham ne ehsās se parkhā tire ehsās kā rang

ham ne jaanā hai kahāñ terī tamanna kā qadam

tū ne dil chiir ke zarroñ kā darūñ bhī dekhā

terī nazroñ meñ thā sūraj bhī charāġh-e-rah-e-bād

āgahī ne tujhe baḳhshī thī basīrat aisī

khel aurang-e-sulaimān huā tere nazdīk

be-haqīqat lagā ejāz-e-masīhā tujh ko

jab kahā tū ne ki har fard hai nā-ḳhvāñda-varaq

apnī hī zaat se vāqif na the tab ahl-e-hunar

ik sadī baad khulā ham pe tafakkur terā

ham ne jaanā ki tirī fikr hai bahtā dariyā

tere afkār nahīñ ek zamāne ke asiir

terā ehsās har ik asr se yuuñ guzregā

raushnī jaise añdheroñ se guzar jaatī hai

tū ne alfāz ko baḳhshī hai hayāt-e-jāved

sher haiñ jism faqat rūh-e-matālib tū hai

fikr kyūñkar na ho maġhlūb ki 'ġhālib' tū hai

ek sadi baad khula hum pe tafakkur tera

aankh pechida KHayalon ki tahon tak pahunchi

tere jazbaat ki aatish ne lahu garmaya

fahm-o-idrak shanawar bane gahre-pan ke

hum ne ehsas se parkha tere ehsas ka rang

hum ne jaana hai kahan teri tamanna ka qadam

tu ne dil chir ke zarron ka darun bhi dekha

teri nazron mein tha suraj bhi charagh-e-rah-e-baad

aagahi ne tujhe baKHshi thi basirat aisi

khel aurang-e-sulaiman hua tere nazdik

be-haqiqat laga ejaz-e-masiha tujh ko

jab kaha tu ne ki har fard hai na-KHwanda-waraq

apni hi zat se waqif na the tab ahl-e-hunar

ek sadi baad khula hum pe tafakkur tera

hum ne jaana ki teri fikr hai bahta dariya

tere afkar nahin ek zamane ke asir

tera ehsas har ek asr se yun guzrega

raushni jaise andheron se guzar jati hai

tu ne alfaz ko baKHshi hai hayat-e-jawed

sher hain jism faqat ruh-e-matalib tu hai

fikr kyunkar na ho maghlub ki 'ghaalib' tu hai