gandhi ji ab bhi kahte hain

titlī

jugnū

shabnam

gul

nazroñ ke sab dhoke haiñ

jagmag karte mausam ke

saare manzar jhūTe haiñ

andar se sab TuuTe haiñ

pagDanDī par jīvan kī

raqs-o-surūd-o-nik.hat ban kar

ḳhushiyoñ kā kuchh ġhāza mal kar

hañstā hañstā chehra le kar

ik raahī jab chaltā hai

pal pal apne qadmoñ meñ

kañkar patthar sahtā hai

kāñToñ ko gul kahtā hai

lekin gāñdhī jī aksar

mere sar par

thapkī shafqat kī de kar

sargoshī meñ kahte haiñ

beTī

badle mausam meñ

ulTe-palTe lamhoñ meñ

raushan raushan lafzoñ se

ḳhushbū dete lahjoñ se

mīThī mīThī nazroñ se

muflis bekal duniyā ko

hargiz jannat mat kahnā

sach ko jhūTā mat karnā

haañ jī beTī mumkin ho to

qadmoñ se tum jīvan ke

kañkar patthar kāñToñ ko

chupke chupke chuntī rahnā

aur chāhat ulfat rāhat kī

anmiT daulat detī rahnā

qur.āñ giitā paḌhtī rahnā

insāñ ban kar jiitī rahnā

sach ko raushan kartī rahnā

titli

jugnu

shabnam

gul

nazron ke sab dhoke hain

jagmag karte mausam ke

sare manzar jhuTe hain

andar se sab TuTe hain

pagDanDi par jiwan ki

raqs-o-surud-o-nikhat ban kar

KHushiyon ka kuchh ghaza mal kar

hansta hansta chehra le kar

ek rahi jab chalta hai

pal pal apne qadmon mein

kankar patthar sahta hai

kanTon ko gul kahta hai

lekin gandhi ji aksar

mere sar par

thapki shafqat ki de kar

sargoshi mein kahte hain

beTi

badle mausam mein

ulTe-palTe lamhon mein

raushan raushan lafzon se

KHushbu dete lahjon se

miThi miThi nazron se

muflis bekal duniya ko

hargiz jannat mat kahna

sach ko jhuTa mat karna

han ji beTi mumkin ho to

qadmon se tum jiwan ke

kankar patthar kanTon ko

chupke chupke chunti rahna

aur chahat ulfat rahat ki

anmiT daulat deti rahna

quran gita paDhti rahna

insan ban kar jiti rahna

sach ko raushan karti rahna