gandhi-ji

nigāh-e-shauq meñ jalve jo tere aate haiñ

tajalliyoñ ke na.e taur jagmagāte haiñ

talāsh-e-haq meñ jidhar bhī jahāñ bhī jaate haiñ

tire hī naqsh-e-qadam rah-guzar meñ paate haiñ

tire jamāl se ai banda-e-ḳhudā sābit

ḳhudā ke nuur se insāñ banā.e jaate haiñ

kabhī jo dair-o-haram ke qarīb tak na ga.e

tirī samādhī ke aage vo sar jhukāte haiñ

bayān ek tirā naqsh ho gayā dil par

sunāne vaale fasāne bahut sunāte haiñ

ye kis muġhannī-e-kāmil kī bazm-e-rangīñ hai

yahāñ jo aate haiñ vo naġhma-bār aate haiñ

chaman unhī kā ye rang-e-chaman bhī un kā hai

jo bijliyoñ se yahāñ āshiyāñ banāte haiñ

jahān-e-amn meñ talvār chal nahīñ saktī

ḳhudā ke bande magar āzmā.e jaate haiñ

ye bazm-e-rind nahīñ mahfil-e-tarīqat hai

yahāñ hayāt ke sāġhar pilā.e jaate haiñ

maiñ jā rahā huuñ liye ek kārvān-e-hayāt

hazār rahzan-e-hastī mujhe Darāte haiñ

jo baj rahā hai zamāne meñ saaz terā hai

jo gā rahe haiñ faqat tere giit gaate haiñ

vo tujh ko aur tirā mudda.ā nahīñ samjhe

tujhe bashar se jo fauq-ul-bashar batāte haiñ

jinhoñ ne chuum liye paañv terī azmat ke

sitāre ban ke vo zarre bhī jhilmilāte haiñ

charāġh-e-rāh-e-sadāqat batā kidhar jaa.eñ

ki manziloñ ke añdhere hameñ bulāte haiñ

tire hī faiz se abnā-e-nazm-e-nau 'hindī'

na.ī zamīn nayā āsmāñ banāte haiñ

nigah-e-shauq mein jalwe jo tere aate hain

tajalliyon ke nae taur jagmagate hain

talash-e-haq mein jidhar bhi jahan bhi jate hain

tere hi naqsh-e-qadam rah-guzar mein pate hain

tere jamal se ai banda-e-KHuda sabit

KHuda ke nur se insan banae jate hain

kabhi jo dair-o-haram ke qarib tak na gae

teri samadhi ke aage wo sar jhukate hain

bayan ek tera naqsh ho gaya dil par

sunane wale fasane bahut sunate hain

ye kis mughanni-e-kaamil ki bazm-e-rangin hai

yahan jo aate hain wo naghma-bar aate hain

chaman unhi ka ye rang-e-chaman bhi un ka hai

jo bijliyon se yahan aashiyan banate hain

jahan-e-amn mein talwar chal nahin sakti

KHuda ke bande magar aazmae jate hain

ye bazm-e-rind nahin mahfil-e-tariqat hai

yahan hayat ke saghar pilae jate hain

main ja raha hun liye ek karwan-e-hayat

hazar rahzan-e-hasti mujhe Daraate hain

jo baj raha hai zamane mein saz tera hai

jo ga rahe hain faqat tere git gate hain

wo tujh ko aur tera muddaa nahin samjhe

tujhe bashar se jo fauq-ul-bashar batate hain

jinhon ne chum liye panw teri azmat ke

sitare ban ke wo zarre bhi jhilmilate hain

charagh-e-rah-e-sadaqat bata kidhar jaen

ki manzilon ke andhere hamein bulate hain

tere hi faiz se abna-e-nazm-e-nau 'hindi'

nai zamin naya aasman banate hain