ghaza

lahū aaj phir bah rahā hai

zamīñ to zamīñ āsmāñ surḳh hai

dayār-e-ashokā meñ phir raqs iblīs kā hai

chaman-zār-e-gautam meñ haiñ chāk-dar-chāk kaliyāñ

zabāñ 'mīr'-o-'ġhālib' kī ab kushtanī hai

nigār-e-vatan dar pe jamhūr ke sar-nigūñ hai

magar ai shahīdān-e-urdu

tumhārā lahū

charāġh-e-sar-e-rahguzar hai

matā-e-girāñ bahr-e-fikr-o-nazar hai

payām-e-tulū-e-sahar hai

tumhāre lahū se

lab-e-vaqt par aa gayā hai tabassum

anādil ne paayā hai zauq-e-tarannum

zabān-e-ḳhamoshī ne sīkhī hai tarz-e-takallum

yaqīñ hai

lahū ye tumhārā

ruḳh-e-'mīr'-o-'ġhālib' kā ġhāza banegā

jabīn-e-vatan par

ye chamkegā sindūr ban kar

lahu aaj phir bah raha hai

zamin to zamin aasman surKH hai

dayar-e-ashoka mein phir raqs iblis ka hai

chaman-zar-e-gautam mein hain chaak-dar-chaak kaliyan

zaban 'mir'-o-'ghaalib' ki ab kushtani hai

nigar-e-watan dar pe jamhur ke sar-nigun hai

magar ai shahidan-e-urdu

tumhaara lahu

charagh-e-sar-e-rahguzar hai

mata-e-giran bahr-e-fikr-o-nazar hai

payam-e-tulu-e-sahar hai

tumhaare lahu se

lab-e-waqt par aa gaya hai tabassum

anadil ne paya hai zauq-e-tarannum

zaban-e-KHamoshi ne sikhi hai tarz-e-takallum

yaqin hai

lahu ye tumhaara

ruKH-e-'mir'-o-'ghaalib' ka ghaza banega

jabin-e-watan par

ye chamkega sindur ban kar