gham-ashna

mire ġham kī mahram

na jaane mire ġham meñ kyā dilkashī tum ne paa.ī

ki apnā liyā hai ise is tarah jaise ye ġham tumhārā hī ġham ho

mire ġham meñ kyā dilkashī hai

mujhe mujh se āgāh karne meñ kaisī jhijak ye pas-o-pesh kaisā

batāo vo kyā shai hai mujh meñ ki jis kī kashish ne

tumheñ apnī ḳhushiyāñ mire ġham meñ tahlīl karne pe rāġhib kiyā hai

ki jis ne tumheñ is qadar sochne kī bhī mohlat nahīñ dī

ki ye ġham jise tum ne be-saudā apnā liyā hai

tumhārā nahīñ hai

tumheñ merī bātoñ se dukh ho rahā hai

tumheñ merī bātoñ meñ begānagī sī nazar aa rahī hai

faqat is liye ki tumheñ shādmāñ dekhne kī mujhe aarzū hai

magar tum mire ġham meñ paiham ghulī jā rahī ho

mirī samt dekho

ye ashkoñ se labrez palkeñ uThāo

mujhe ab koī ġham nahīñ hai

mujhe ab koī ġham nahīñ hai

mere gham ki mahram

na jaane mere gham mein kya dilkashi tum ne pai

ki apna liya hai ise is tarah jaise ye gham tumhaara hi gham ho

mere gham mein kya dilkashi hai

mujhe mujh se aagah karne mein kaisi jhijak ye pas-o-pesh kaisa

batao wo kya shai hai mujh mein ki jis ki kashish ne

tumhein apni KHushiyan mere gham mein tahlil karne pe raghib kiya hai

ki jis ne tumhein is qadar sochne ki bhi mohlat nahin di

ki ye gham jise tum ne be-sauda apna liya hai

tumhaara nahin hai

tumhein meri baaton se dukh ho raha hai

tumhein meri baaton mein beganagi si nazar aa rahi hai

faqat is liye ki tumhein shadman dekhne ki mujhe aarzu hai

magar tum mere gham mein paiham ghuli ja rahi ho

meri samt dekho

ye ashkon se labrez palken uThao

mujhe ab koi gham nahin hai

mujhe ab koi gham nahin hai